အသင်းခေါင်းဆောင်ဟောင်း နိုဘယ်လ်ဟာ အားကစားဒါရိုက်တာရာထူးနဲ့ ၂၀၂၃ ဇန်နဝါရီ ၂ ရက်မှာ ဝက်စ်ဟမ်းအသင်းထံ ပြန်လာမှာ ဖြစ်ပါတယ်။
နိုဘယ်လ်ဟာ ဝက်စ်ဟမ်းအသင်းအတွက် ပွဲပေါင်း ၅၅၀ ပါဝင်ကစားပြီးနောက် အခုနွေရာသီမှာ ကစားသမားဘဝကို အဆုံးသတ်ခဲ့တာပါ။နိုဘယ်လ်ဟာ ဝက်စ်ဟမ်းအသင်းမှာ နည်းပြ မိုယက်စ်နဲ့ အလုပ်တွဲလုပ်ရမှာလည်း ဖြစ်ပါတယ်။
နိုဘယ်လ်က “ဒီကိုပြန်လာရတာ တကယ်ကို ဝမ်းသာပါတယ်။ဝက်စ်ဟမ်းအသင်းမှာ ဒီရာထူးကို ရယူရမှာကို ဂုဏ်ယူမိပါတယ်။ဒါဟာ ပုဂ္ဂိုလ်ရေးအရရော ပရော်ဖက်ရှင်နယ်မှာပါ ကျွန်တော်ကြီးပွားတိုးတက်အောင်လုပ်နိုင်တဲ့ အရာလို့ မြင်ပါတယ်”
“ပြီးခဲ့တဲ့ ၂ ရာသီက အလွန်တိုးတက်ခဲ့ပြီး လမ်းကြောင်းမှန်ပေါ်ရောက်အောင် ဆက်ပြီးကူညီချင်ခဲ့တယ်”လို့ ပြောခဲ့တာပါ။နိုဘယ်လ်ဟာ ဝက်စ်ဟမ်းကို ၂၀၀၀ က လူငယ်ကစားသမားအဖြစ်နဲ့ ရောက်ရှိခဲ့တာဖြစ်ပါတယ်။
၂၀၀၄ မှာတော့ စီနီယာကစားသမားအဖြစ် ပွဲထွက်ခွင့်ရခဲ့ပြီး ၂၀၀၆ မှာ ဟူးလ်စီးတီးနဲ့ အစ်စဝှစ်ခ်ျအသင်းတွေထံ အငှားနဲ့ ကာလတိုသွားရောက်ကစားခဲ့တာဖြစ်ပါတယ်။
ဝက်စ်ဟမ်းအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ရလဒ်တွေဆိုးရွားနေပြီး တန်းဆင်းဇုန် အဆင့် ၁၈ နေရာမှာ ရပ်တည်နေတာဖြစ်ပါတယ်။