အင်္ဂလန်လူစာရင်းမှာ ချန်လှပ်ခံရပြီးနောက် ရက်ရှ်ဖိုဒ့်က သူဟာ လက်ရွေးစင်အတွက် ထပ်မံပါဝင်ကစားပေးဖို့ အဆင်သင့်မဖြစ်သေးဘူးလို့ ပြောလိုက်ပါတယ်။
ကာတာကမ္ဘာ့ဖလားပြိုင်ပွဲမတိုင်ခင် ကစားမယ့် နေးရှင်းလိဂ်ပြိုင်ပွဲအတွက် အင်္ဂလန်ကစားသမား ၂၈ ဦးစာရင်းကို နည်းပြ ဆောက်ဂိတ်က ထုတ်ပြန်ခဲ့ပါတယ်။ဒီစာရင်းမှာ ရက်ရှ်ဖိုဒ့်အပြင် ယူနိုက်တက်အသင်းဖော် ဆန်ချိုလည်း မပါဝင်ခဲ့တာပါ။
ရက်ရှ်ဖိုဒ့်ဟာ ပြီးခဲ့တဲ့ ယူရိုပြိုင်ပွဲဗိုလ်လုပွဲပြီးကတည်းက လက်ရွေးစင်အတွက် ပါဝင်ကစားရခြင်း မရှိသေးတာဖြစ်ပါတယ်။ကစားသမားဟာ ဒဏ်ရာတွေနဲ့ ရုန်းကန်ခဲ့ရပြီး ကလပ်အသင်းမှာလည်း ခြေစွမ်းမပြသနိုင်ခဲ့တာပါ။
ဒါပေမယ့် ရက်ရှ်ဖိုဒ့်ဟာ ဒီရာသီမှာတော့ ယူနိုက်တက်အတွက် ခြေစွမ်းပြနေပြီး ၆ ပွဲကစားအပြီးမှာ ၃ ဂိုးသွင်းယူကာ ၂ ဂိုးဖန်တီးထားတာဖြစ်ပါတယ်။ရက်ရှ်ဖိုဒ့်ဟာ ယူနိုက်တက်အသင်း အနိုင်ရခဲ့တဲ့ ရှရစ်ဖ်နဲ့ ပွဲမှာလည်း ပါဝင်ခြင်းမရှိခဲ့တာပါ။
ရက်ရှ်ဖိုဒ့်က “အင်္ဂလန်နဲ့ ပတ်သက်လာရင် ကစားသမားတိုင်းက ကိုယ့်နိုင်ငံကို ကိုယ်စားပြုခွင့်ရချင်ပါတယ်။ကျွန်တော်လည်း မခြားနားပါဘူး။ကံမကောင်းစွာပဲ ဒဏ်ရာရခဲ့လို့ ကျွန်တော် အဆင်သင့်မဖြစ်သေးပါဘူး”လို့ တွစ်တာမှာ ရေးသားခဲ့ပါတယ်။
အင်္ဂလန်နည်းပြ ဆောက်ဂိတ်ဟာ တိုက်စစ်ပိုင်းနေရာအတွက် ဘရန်ဖိုဒ့်အတွက် ခြေစွမ်းပြနေတဲ့ တိုနေးကို ပထမဆုံးအကြိမ်ရွေးချယ်သွားခဲ့ပါတယ်။