ယူနိုက်တက်ကွင်းလယ်လူ ဘရူနိုဖာနန်ဒက်စ်ဟာ အက်ဖ်အေဖလားဗိုလ်လုပွဲမတိုင်ခင် ပြောခဲ့တဲ့ မှတ်ချက်နဲ့ ပတ်သတ်ပြီး မန်စီးတီးနည်းပြ ဂွာဒီယိုလာက ပြန်ပြီးတုံ့ပြန်လာခဲ့တာဖြစ်ပါတယ်။
ဂွာဒီယိုလာရဲ့ မန်စီးတီးအသင်းဟာ ဒီရာသီမှာ ဆုဖလား ၃ လုံးရယူနိုင်ဖို့ ပစ်မှတ်ထားနေပြီး ဒီလိုမျိုးဆုဖလား ၃ လုံးစလုံးကို တစ်ရာသီထဲရယူနိုင်တဲ့ အသင်းဆိုလို့ အင်္ဂလန်မှာ ယူနိုက်တက်အသင်းက ၁၉၉၉ က ရရှိထားတာဖြစ်ပါတယ်။အဲ့ဒါကြောင့် မန်စီးတီးအသင်းဟာ ဒီလိုမျိုးလုပ်ပြနိုင်ဖို့မျှော်လင့်နေတာပါ။
ဒါနဲ့ ပတ်သတ်ပြီး ဘရူနိုဖာနန်ဒက်စ်က “ကျွန်တော်တို့က ကျွန်တော်တို့ ကလပ်ရဲ့သမိုင်းကြောင်းကို သိပြီး ပရိသတ်တွေကလည်း မန်စီးတီးကို ဒီလိုမျိုးမဖြစ်ချင်ကြပါဘူး။ကျွန်တော်တို့ ဒီဖလားရခဲ့ရင် မန်စီးတီးက ဆုဖလား ၃ လုံးမရနိုင်တော့ပါဘူး။ဒါပေမယ့် ကစားသမားတွေက ကိုယ့်အလုပ်ကိုယ်လုပ်ပြီး ပရိသတ်တွေအတွက် ဆုဖလားတွေယူပေးချင်လို့ ပွဲကိုအနိုင်ယူချင်တယ်။ဒါပါပဲ”လို့ ဆိုခဲ့ပါတယ်။
ဘရူနိုဖာနန်ဒက်စ်ပြောခဲ့တဲ့အပေါ် ဂွာဒီယိုလာက “ဒါကို ကျွန်တော်နားလည်ပြီး ဆုဖလား ၃ လုံးအောင်မြင်မှုကို သူတို့ပိုင်ဆိုင်ထားပါတယ်။ဒါက ပုံမှန်ပါပဲ။အားကစားမှာတော့ စံချိန်မှတ်တမ်းတွေက ကျိုးပျက်ပါလိမ့်မယ်။ဒီလိုမှတ်တမ်းကို ဘယ်သူကိုမှမပိုင်ဆိုင်စေချင်တဲ့အတွက် ခံစားချက်ကပုံမှန်ပါပဲ”
“ဒါက ဘောလုံးပွဲဖြစ်ပြီး ပိုကောင်းတဲ့အသင်းက နိုင်ပွဲရယူသွားပါလိမ့်မယ်”လို့ ဆိုခဲ့တာဖြစ်ပါတယ်။မန်စီးတီးနဲ့ ယူနိုက်တက်တို့ဟာ ဒီနေ့ညမှာ အက်ဖ်အေဖလားဗိုလ်လုပွဲအဖြစ် ယှဉ်ပြိုင်ရမှာဖြစ်ပါတယ်။