ယူနိုက်တက်နည်းပြ အဲရစ်တန်ဟတ်က မန်စီးတီးရဲ့ဆုဖလား ၃ လုံးအောင်မြင်မှုကို ရပ်တန့်ဖိုကို စိတ်မဝင်စားဘဲ ကိုယ့်အသင်း ဆုဖလားအောင်မြင်မှုရဖို့အတွက်ပဲ တွေးတယ်လို့ ပြောခဲ့ပါတယ်။
အဲရစ်တန်ဟတ်ဟာ ဒီရာသီဒုတိယမြောက်ဆုဖလားအဖြစ် FA ဖလားကို ရယူနိုင်ဖို့ မျှော်လင့်ထားပါတယ်။ယူနိုက်တက်အသင်းဟာ ပြီးခဲ့တဲ့ ဖေဖော်ဝါရီလက ကာရာဘောင်းဖလားရရှိထားပြီး ၆ နှစ်ကြာဆုဖလား လက်မဲ့ဖြစ်တာကို အဆုံးသတ်နိုင်ခဲ့တာဖြစ်ပါတယ်။
မန်စီးတီးအသင်းဟာ ၁၉၉၉ က ယူနိုက်တက်အသင်းရဲ့အောင်မြင်မှုဖြစ်တဲ့ ပရီးမီးယားလိဂ်၊အက်ဖ်အေဖလားနဲ့ ကာရာဘောင်းဖလားတို့ကို ရယူဖို့ ပစ်မှတ်ထားနေတာဖြစ်ပါတယ်။အဲရစ်တန်ဟတ်ကတော့ ဒီအကြောင်းတွေထက် သူတို့ဟာ ဆုဖလားအောင်မြင်မှုရဖို့အတွက်သာ တွေးတယ်လို့ ပြောခဲ့တာပါ။
အဲရစ်တန်ဟတ်က “ကျွန်တော်တို့ ဒီဖလားကို ရယူချင်ပါတယ်။ဒါက မန်စီးတီးကို ရပ်တန့်ဖို့မဟုတ်ပါဘူး။ကျွန်တော်တို့ ဆုဖလားရယူနိုင်မယ့်အကြောင်းပါ။အခွင့်အရေးကောင်းပါပဲ။ဖလားဗိုလ်လုပွဲမှာ မန်စီးတီးနဲ့တွေ့ရတာက အလွန်ကောင်းပါတယ်”
“ဒါက အခွင့်ရေးကောင်းဖြစ်ပြီး ဒီအတွက် ကျွန်တော်တို့ ကြိုးစားခဲ့ပါတယ်။ဒီပွဲက ကျွန်တော်တို့အတွက် ကောင်းမွန်တဲ့ စမ်းသပ်မှုပါ။မန်စီးတီးက အလွန်ကောင်းမွန်ပေမယ့် သူတို့ကို ကြည့်သွားမှာမဟုတ်ဘူး”လို့ ပြောခဲ့ပါတယ်။
