ဘရာဂါအသင်းကို အနိုင်ရခဲ့တဲ့ ချန်ပီယံလိဂ်ပွဲစဉ်မှာ ပေါင်ဒဏ်ရာရရှိခဲ့တဲ့ ကွင်းလယ်လူ ဘယ်လင်ဂမ်ဟာ ဒီနေ့မှာ ကစားမယ့် ဘာစီလိုနာအသင်းနဲ့ အယ်လ်ကလက်ဆီကိုပွဲစဉ်မှာ ပါဝင်ကစားဖို့ အဆင်သင့်ဖြစ်နေပြီလို့ ရီးရယ်လ်အသင်းနည်းပြ အန်ဆယ်လော့တီက ပြောခဲ့ပါတယ်။
ဘယ်လင်ဂမ်ဟာ ဒေါ့မွန်အသင်းကနေ ပြောင်းရွှေ့လာပြီးကတည်းက ရီးရယ်လ်အသင်းအတွက် ခြေစွမ်းပြသနေတာဖြစ်ပြီး ပြိုင်ပွဲစုံ ၁၂ ပွဲမှာ ၁၁ ဂိုးသွင်းယူကာ ၃ ဂိုးဖန်တီးထားတာပါ။ဘယ်လင်ဂမ်ဟာ ဘရာဂါအသင်းနဲ့ ပွဲမှာ ဂိုးသွင်းယူနိုင်ခဲ့ပြီးနောက် ချန်ပီယံလိဂ်အုပ်စုအဆင့် ပထမ ၃ ပွဲမှာဂိုးသွင်းယူနိုင်တဲ့ ဒုတိယမြောက် ရီးရယ်လ်ကစားသမားဖြစ်လာခဲ့ပါတယ်။
အန်ဆယ်လော့တီက “ဘယ်လင်ဂမ်ဟာ ကောင်းမွန်နေပြီလို့ ခံစားရတာကြောင့် ဘာစီလိုနာအသင်းနဲ့ ပွဲကို သူပါဝင်ကစားနိုင်မှာပါ။ သူရဲ့ပိုလျှံနေတဲ့ ကြွက်သားကို ဖယ်ရှားနိုင်ခဲ့ပါပြီ။အယ်လ်ကလက်စီကိုက ဘာလဲဆိုတာ သူ့ကိုရှင်းပြနေဖို့ မလိုအပ်ပါဘူး။လူတိုင်းကလည်း ဒါကိုသိပါတယ်။ဒါက ကမ္ဘာတစ်ဝှမ်းစိတ်ဝင်စားတဲ့ပွဲတစ်ပွဲပါ”လို့ဆိုခဲ့ပါတယ်။
ဒါ့အပြင် အန်ဆယ်လော့တီက ဒီပွဲကို ဗိုလ်လုပွဲလို့ မမြင်မိဘူးလို့လည်း ပြောခဲ့ပါတယ်။အန်ဆယ်လော့တီက “ဒီပွဲက ဒီရာသီရဲ့ပထမဆုံးအယ်လ်ကလက်စီကိုပွဲပါ။နောက်ထပ်တွေ့ဆုံရမယ့် အယ်လ်ကလက်စီကိုပွဲတွေလည်း ရှိလာမှာပါ။ကျွန်တော်တို့ဟာ ဒီပွဲအတွက် ပုံစံကောင်းရှိနေပါတယ်”လို့ဆိုခဲ့ပါတယ်။
အယ်လ်ကလက်စီကိုပွဲမတိုင်ခင်မှာ ဂျီရိုနာအသင်းဟာ ဆယ်လ်တာဗီဂိုအသင်းကို အနိုင်ရခဲ့တဲ့အတွက် လာလီဂါအမှတ်ပေးဇယားထိပ်ဆုံးနေရာကို ၃ မှတ်အသာနဲ့ ဦးဆောင်နေတာဖြစ်ပါတယ်။
