ယူနိုက်တက်တိုက်စစ်မှူး ရက်ရှ်ဖိုဒ့်ဟာ ဆီဗီလာနဲ့ ကစားရမယ့် ယူရိုပါလိဂ်ကွာတားဖိုင်နယ် ဒုတိယအကျော့ပွဲစဉ်မတိုင်ခင်အသင်းရဲ့လေ့ကျင့်ခန်းအစီအစဉ်မှာ ပြန်လည်ပါဝင်လာခဲ့တယ်လို့ သိရပါတယ်။
ဒီရာသီမှာ ယူနိုက်တက်အသင်းအတွက် ခြေစွမ်းပြသပြီး ဂိုးအများအပြားသွင်းယူထားတဲ့ ရက်ရှ်ဖိုဒ့်ဟာ အဲဗာတန်အသင်းကို အနိုင်ရခဲ့တဲ့ ပရီးမီးယားလိဂ်ပွဲမှာ ရခဲ့တဲ့ ဒဏ်ရာကြောင့် နောက်ဆုံးကစားခဲ့တဲ့ ပွဲစဉ် ၂ ပွဲကို မပါဝင်နိုင်ခဲ့တာပါ။
ယူနိုက်တက်အသင်းဟာ ရက်ရှ်ဖိုဒ့်မပါဝင်နိုင်တဲ့ ယူရိုပါလိဂ်ကွာတားဖိုင်နယ်ပထမအကျော့ပွဲစဉ်မှာ ဆီဗီလာအသင်းနဲ့ ၂ ဂိုးစီသရေကျခဲ့ပါတယ်။ရက်ရှ်ဖိုဒ့်ဟာ စပိန်မှာ ကစားမယ့် ဒုတိယအကျော့ပွဲစဉ်မှာတော့ အသင်းရဲ့လူစာရင်းမှာ ပါဝင်လာနိုင်ဖွယ်ရှိနေတာဖြစ်ပါတယ်။
ရက်ရှ်ဖိုဒ့်နဲ့အတူ ဒဏ်ရာကြောင့် အနားယူနေရတဲ့ နောက်ခံလူ လုပ်ခ်ရှောနဲ့ ကွင်းလယ်ကစားသမား ဆာဘစ်ဇာတို့ကလည်း အသင်းရဲ့လေ့ကျင့်ခန်းအစီအစဉ်မှာ ပြန်လည်ပါဝင်ခဲ့သလို နောက်ခံလူတစ်ဦးဖြစ်တဲ့ မာလာစီယာလည်း လေ့ကျင့်ခန်းအစီအစဉ်မှာ ပါဝင်ခဲ့တာပါ။
ယူနိုက်တက်အသင်းဟာ ဆီဗီလာနဲ့ ယူရိုပါလိဂ်ပွဲပြီးရင် အက်ဖ်အေဖလားဆီမီးဖိုင်နယ်ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရဖို့ ရှိနေတာဖြစ်ပါတယ်။
