ဒီမနက်ကစားခဲ့တဲ့ ယူရိုပါလိဂ်ဆီမီးဖိုင်နယ် ပထမအကျော့ပွဲစဉ်မှာ ရိုးမားအသင်းဟာ လေဗာကူဆင်အသင်းကို ၁ ဂိုး- ဂိုးမရှိနဲ့ အနိုင်ရသွားခဲ့ပါတယ်။
ရိုးမားအတွက် တစ်လုံးတည်းသောသွင်းဂိုးကို ဘိုဗီက ပွဲချိန် ၆၂ မိနစ်မှာ သူ့ရဲ့ပထမဆုံးဥရောပသွင်းဂိုး အဖြစ် သွင်းယူနိုင်ခဲ့ပါတယ်။ဒီပွဲမှာ ရိုးမားအသင်းဟာ ဘောလုံးပိုင်ဆိုင်မှုအသာစီးမရခဲ့ပေမယ့် ဂိုးပေါက်ကန်သွင်းမှုနဲ့ ဂိုးပေါက်ထိရောက်မှုအပိုင်းမှာတာ့ လေဗာကူဆင်ကို အသာရခဲ့တာဖြစ်ပါတယ်။
လေဗာကူဆင်အသင်းဟာ ဒီပွဲရဲ့ပွဲချိန် ၆ မိနစ်ကတည်းက ဂိုးရနိုင်မယ့် အခွင့်အရေးရခဲ့ပေမယ့် အသုံးမချနိုင်ခဲ့သလို၊ ပွဲချိန် ၈၆ မိနစ်မှာ ချေပဂိုးရနိုင်မယ့် ဖရင်ပေါင်ရဲ့ကြိုးစားမှုကို ပတ်ထရီစီယိုက တားဆီးနိုင်ခဲ့တာဖြစ်ပါတယ်။
မော်ရင်ဟိုကိုင်တွယ်နေတဲ့ ရိုးမားအသင်းဟာ အိမ်ကွင်းမှာ ကစားခဲ့ရတဲ့ ဒီပွဲမှာ အကောင်းဆုံးပုံစံနဲ့ လေဗာကူဆင်အသင်းကို ဂိုးမပေးရအောင် ထိန်းချုပ်နိုင်ခဲ့ပြီး ဒုတိယအကျော့ကို ၁ ဂိုးအသာနဲ့ ဂျာမနီဆီချီတက်မှာဖြစ်ပါတယ်။မော်ရင်ဟိုကတော့ ၆ ကြိမ်မြောက် ဥရောပဗိုလ်လုပွဲတက်နိုင်ဖို့ ပစ်မှတ်ထားနေတာပါ။
ဒီပွဲမှာတော့ မော်ရင်ဟိုဟာ ရီးရယ်လ်အသင်းကို ကိုင်တွယ်ချိန်က သူ့လက်အောက်မှာ ကစားခဲ့တဲ့ အလွန်ဆိုနဲ့ ထိပ်တိုက်ရင်ဆိုင်ခဲ့ရပြီး ဒုတိယအကျော့မှာရော ရလဒ်ကောင်းရယူနိုင်မလားဆိုတာ စောင့်ကြည့်ရမှာဖြစ်ပါတယ်။