ယူနိုက်တက်အသင်းနည်းပြ အဲရစ်တန်ဟတ်က ကိုပေဟေဂင်အသင်းကို အရေးနိမ့်တဲ့ပွဲက
ဒိုင်လူကြီးရဲ့ဆုံးဖြတ်ချက်တွေအပေါ် စိတ်ပျက်မိတယ်လို့ ပွဲအပြီးသတင်းစာရှင်းလင်းပွဲမှာ ပြောလိုက်ပါတယ်။
ယူနိုက်တက်အသင်းဟာ ဒီပွဲစဉ်မှာ ကိုပေဟေဂင်အသင်းကို ၂ ဂိုး- ဂိုးမရှိနဲ့ ဦးဆောင်နေခဲ့ပေမယ့် ရက်ရှ်ဖိုဒ့်က ပြိုင်ဘက်ကစားသမားကို ကြမ်းတမ်းစွာကစားခဲ့တယ်ဆိုပြီး တိုက်ရိုက်အနီကတ်နဲ့ ထုတ်ပယ်ခံရပြီးနောက်မှာ ပွဲရလဒ်ဟာ ပြောင်းလဲသွားခဲ့တာပါ။အဲရစ်တန်ဟတ်ကတော့ ကိုပေဟေဂင်ရဲ့သွင်းဂိုး ၂ ဂိုးကိုလည်း ခွင့်မပြုသင့်ဘူးလို့ဆိုခဲ့ပါတယ်။
အဲရစ်တန်ဟတ်က ” အနီကတ်က အရာအားလုံးပြောင်းလဲသွားခဲ့တာပါ။အနီကတ်မထိခင်အထိ ကျွန်တော်တို့ ကစားပုံကောင်းနေခဲ့ပါတယ်။ဒါပေမယ့် အနီကတ်လည်းထိရော ကွဲပြားခြားနားသွားခဲ့ပါတယ်။ဒီဆုံးဖြတ်ချက်က ပြင်းထန်ပါတယ်”
“ကိုပေဟေဂင်သွင်းတဲ့ ၂ ဂိုးကို ခွင့်မပြုသင့်ပါဘူး။ ၁ ဂိုးကလူကျွံနေပါတယ်။ပြိုင်ဘက်ကစားသမားက အိုနာနာရှေ့မှာရောက်နေတာပါ။ပင်နယ်တီပေးတာကလည်း ပြင်းထန်ပါတယ်။ဒီဆုံးဖြတ်ချက်တွေကို အလွန်စိတ်ပျက်မိပါတယ်”လို့ ဆိုခဲ့ပါတယ်။
ယူနိုက်တက်အသင်းဟာ ဒီရှုံးပွဲကြောင့် ချန်ပီယံလိဂ်နောက်တစ်ဆင့်တက်ဖို့ ခက်ခဲသွားပြီး လက်ကျန် ၂ ပွဲကို မဖြစ်မနေအနိုင်ရဖို့ လိုအပ်နေတာဖြစ်ပါတယ်။