ဘိုင်ယန်မြူးနစ်အသင်းဟာ မန်စီးတီးနဲ့ ချန်ပီယံလိဂ်ကွာတားဖိုင်နယ်ပထမအကျော့ပွဲစဉ်အပြီးမှာ ဆာနေးရဲ့မျက်နှာကို လက်သီးနဲ့ထိုးခဲ့တဲ့ မာနေးကို ဟော်ဖန်ဟိမ်းနဲ့ ဘွန်ဒစ်လီဂါပွဲစဉ်အတွက် အသင်းလူစာရင်းကနေ ချန်လှပ်ခဲ့ပါတယ်။
မာနေးဟာ ဒီပွဲရဲ့ပွဲအပြီးအဝတ်လဲခန်းမှာ ဆားနေးရဲ့မျက်နှာကို လက်သီးနဲ့ထိုးခဲ့တာကြောင့် ဂျာမန်ကစားသမားရဲ့နှုတ်ခမ်းကွဲသွားခဲ့ပါတယ်။ထိပ်တိုက်တွေ့ခဲ့ကြတဲ့ သူတို့နှစ်ဦးကို အသင်းဖော်တွေက လူစုခွဲခဲ့ရတာပါ။
မာနေးဟာ ကြာသပတေးနေ့မနက်ပိုင်းက အသင်းလေ့ကျင့်ခန်းအစီအစဉ်မှာပါဝင်ခဲ့ပေမယ့် ဘိုင်ယန်မြူးနစ်အသင်းဟာ သူ့ကို အရေးယူတဲ့ အနေနဲ့ လာမယ့် ဘွန်ဒစ်လီဂါပွဲစဉ်ရဲ့လူစာရင်းကနေ ချန်လှပ်ခဲ့တာဖြစ်ပါတယ်။
ဒါ့အပြင် မာနေးအနေနဲ့ ကြီးမားတဲ့ ဒဏ်ကြေးငွေပါ ပေးချေရဖို့ ရှိနေပါတယ်။ဘိုင်ယန်မြူးနစ်အသင်းဟာ မာနေးနဲ့ ချုပ်ဆိုထားတဲ့ စာချုပ်ကိုပါ ဖျက်သိမ်းဖို့ စီစဉ်နေတယ်လို့ သတင်းတွေမှာ ဖော်ပြထားပါတယ်။
မာနေးဟာ ဒီရာသီ ဘိုင်ယန်အသင်းမှာ ပွဲကစားခွင့်ရဖို့ ရုန်းကန်နေရတဲ့အပေါ် စိတ်ပျက်နေပြီး လက်ရှိအခြေအနေကြောင့် အသင်းက ထွက်ခွာဖို့ များနေပြီဖြစ်ပါတယ်။