မန်စီးတီးအသင်းမှာ ပွဲမကစားရလို့ စိတ်ပျက်ပြီး ဇန်နဝါရီအပြောင်းအရွှေ့က ဘိုင်ယန်မြူးနစ်အသင်းထံ အငှားနဲ့ပြောင်းရွှေ့ခဲ့တဲ့ ကန်ဆယ်လိုဟာ ဂျာမန်ကလပ်မှာလည်း အရန်ခုံပေါ်မှာ ထိုင်နေရလို့ စိတ်ညစ်နေတာဖြစ်ပါတယ်။
ကန်ဆယ်လိုဟာ ဘိုင်ယန်မြူးနစ်ရောက်ရောက်ချင်းမှာ ပွဲထွက်ခွင့်ရခဲ့ပြီး ခြေစွမ်းပြနိုင်ခဲ့ပေမယ့် နောက်ပိုင်းပွဲစဉ်တွေမှာ နည်းပြဖြစ်သူ နာဂျယ်လ်စမန်းကက ကန်ဆယ်လိုကို အရန်ကစားသမားအဖြစ်သာ အသုံးပြုခဲ့တာပါ။
အရင်က ကန်ဆယ်လိုဟာ အငှားစာချုပ်ကုန်ဆုံးချိန်မှာ ဘိုင်ယန်မြူးနစ်အသင်းထံ အပြီးသတ်ပြောင်းရွှေ့ဖို့ရှိခဲ့ပေမယ့် လက်ရှိအခြေအနေတွေကြောင့် မန်စီးတီးအသင်းဆီကိုသာ ပြန်လာရဖို့ ရှိနေတာဖြစ်ပါတယ်။
ဂွာဒီယိုလာက “ကန်ဆယ်လိုက ဘိုင်ယန်မြူးနစ်အသင်းနဲ့ရှိနေပါတယ်။ဒါနဲ့ပတ်သက်ပြီး ကျွန်တော်မှတ်ချက်ပေးမှာမဟုတ်ပါဘူး။သူက ဘိုင်ယန်မြူးနစ်ကစားသမားပါ။ရာသီကုန်မှာ ကိစ္စရပ်တွေအားလုံးကို ပြန်ပြီးသုံးသပ်သွားမှာပါ”လို့ ပြောခဲ့ပါတယ်။
ဘိုင်ယန်မြူးနစ်နည်းပြ နာဂျယ်လ်စမန်းကတော့ ကန်ဆယ်လိုကို အော့စ်ဘတ်နဲ့ ကစားမယ့် ဘွန်ဒစ်လီဂါပွဲစဉ်မှာ ပွဲထွက်အသုံးပြုသွားမယ်လို့ ပြောခဲ့တာဖြစ်ပါတယ်။
