ယူနိုက်တက်အသင်းကနေ အသင်းဟောင်း ဒေါ့မွန်အသင်းထံ အငှားနဲ့ ပြန်လည်လာရောက်ကစားနေတဲ့ ဆန်ချိုဟာ ဒေါ့မွန်အသင်းက ဝါဒါဘရီမင်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ပွဲမှာ အသင်းအတွက် ဂိုးသွင်းယူပေးနိုင်ခဲ့ပါတယ်။
ယူနိုက်တက်အသင်းမှာ နည်းပြ အဲရစ်တန်ဟတ်နဲ့ အဆင်မပြေဖြစ်ခဲ့လို့ ဒေါ့မွန်အသင်းထံ ပြန်လည်ရောက်ရှိလာခဲ့တဲ့ ဆန်ချိုဟာ ၁၂ ပွဲကစားပြီးမှသာ သူ့ရဲ့သွင်းဂိုးကို ပြန်လည်ရယူနိုင်ခဲ့တာပါ။ဆန်ချိုဟာ ဒေ့ါမွန်အသင်းကို ပြန်ရောက်ရှိလာပြီးချိန်မှာ သွင်းဂိုး ၂ ဂိုးဖန်တီးထားတာဖြစ်ပါတယ်။
ဆန်ချိုဟာ ယူနိုက်တက်အသင်းကို ပေါင် ၇၃ သန်းနဲ့ ၂၀၂၁ ခုနှစ် ဇူလိုင်လက မပြောင်းရွှေ့ခင်က ဒေါ့မွန်အသင်းအတွက် နောက်ဆုံးသွင်းဂိုးကို ၂၀၂၁ ခုနှစ် မေလမှာ သွင်းယူခဲ့တာပါ။အဲ့ဒါကြောင့် ဆန်ချိုဟာ ဒေါ့မွန်အသင်းအတွက် ပထမဆုံးသွင်းဂိုးကို ပြန်လည်ရယူနိုင်ဖို့ ၃ နှစ်နီးပါးကြာ စောင့်ဆိုင်းခဲ့ရတာဖြစ်ပါတယ်။
ဒေါ့မွန်အသင်းဟာ ဒီပွဲရဲ့ပထမပိုင်းမှာ ကွင်းလယ်လူ ဆာဘစ်ဆာအနီကတ်နဲ့ ထုတ်ပယ်ခံခဲ့ရလို့ ဒုတိယပိုင်းမှာ ကစားသမားတစ်ဦးလျော့နဲ့ ကစားခဲ့ရပေမယ့် နိုင်ပွဲရယူနိုင်ခဲ့တာပါ။ဒေါ့မွန်အသင်းဟာ ဒီပွဲအနိုင်ရရှိခဲ့တာကြောင့် ဘွန်ဒစ်လီဂါအမှတ်ပေးဇယားအဆင့် ၄ နေရာမှာ ဆက်လက်ရပ်တည်နေတာဖြစ်ပါတယ်။
