ဘိုင်ယန်မြူးနစ်အသင်းရဲ့ကနေဒါလက်ရွေးစင် ကြယ်ပွင့် အယ်လ်ဖွန်ဆိုဒေးဗီးစ်ဟာ စနေနေ့က ကစားခဲ့တဲ့ ပွဲမှာ တံကောက်ကြောဒဏ်ရာပြဿနာရှိခဲ့လို့ ကမ္ဘာ့ဖလားပြိုင်ပွဲကို လွဲချော်ဖွယ်ရှိနေတယ်လို့ သိရပါတယ်။
ဟာသာဘာလင်အသင်းကို ၃ ဂိုး- ၂ ဂိုးနဲ့ အနိုင်ရခဲ့တဲ့ ဘွန်ဒစ်လီဂါပွဲစဉ်ရဲ့ပွဲချိန် ၆၄ မိနစ်မှာ အယ်လ်ဖွန်ဆိုဒေးဗီးစ်ဟာ ဒဏ်ရာရရှိသွားခဲ့တာပါ။အဲ့ဒါကြောင့် လူးကပ်စ်ဟာနန်ဒက်စ်နဲ့ လူစားလဲခဲ့ရတာဖြစ်ပါတယ်။
အယ်လ်ဖွန်ဆိုဒေးဗီးစ်ဟာ ကမ္ဘာ့ဖလားခြေစစ်ပွဲအောင် ကနေဒါလက်ရွေးစင်ရဲ့အဓိက အစိတ်အပိုင်းအနေနဲ့ ပါဝင်ခဲ့တာပါ။ကနေဒါအသင်းဟာ ကမ္ဘာ့ဖလားပြိုင်ပွဲမှာ ဘယ်လ်ဂျီယံ၊ မော်ရိုကို၊ ခရိုအေးရှားတို့နဲ့ အုပ်စုကျပ်ထဲကို ကျရောက်နေတာဖြစ်ပါတယ်။
ကနေဒါအသင်းဟာ နိုဝင်ဘာလ ၂၃ ရက်မှာ အုပ်စုအဖွင့်ပွဲအဖြစ် ဘယ်လ်ဂျီယံအသင်းနဲ့ ယှဉ်ပြိုင်ရမှာဖြစ်တာကြောင့် အယ်လ်ဖွန်ဆိုဒေးဗီးစ်အနေနဲ့ ၃ ပတ်မလိုတော့တဲ့ အချိန်အတွင်းမှာ ပြန်ကောင်းမွန်လာဖို့ လိုအပ်နေတာပါ။
ဒေးဗီးစ်ဟာ တံကောက်ကြောရှိ ကြွက်သားတစ်ခု စုတ်ပြဲသွားခဲ့တယ်လို့ ဘိုင်ယန်နည်းပြ နာဂျယ်လ်စမန်းက အတည်ပြုထားခဲ့ပြီး ဒဏ်ရာအတိအကျကို သိရဖို့ စကန်ဖတ်စစ်ဆေးမှုတွေ ပြုလုပ်ရမယ်လို့ ပြောထားပါတယ်။
ကမ္ဘာ့ဖလားပြိုင်ပွဲကျင်းပဖို့ နီးကပ်လာချိန်မှာ ကစားသမား တစ်ဦးပြီးတစ်ဦး ဒဏ်ရာပြဿနာရနေတာလည်းဖြစ်ပါတယ်။