ကင်မ်ပန်ဘီက ပီအက်စ်ဂျီအသင်းမှာ သူ့ရဲ့ ဒုအသင်းခေါင်းဆောင်ရာထူးကို ဘတ်ပီထံ အစားထိုးပေးလိုက်တာနဲ့ ပတ်သက်ပြီး သတိမထားမိဘူးလို့ ပြောလာခဲ့ပါတယ်။
ဘတ်ပီဟာ ပြီးခဲ့တဲ့ ဖလားပွဲစဉ်မှာ မာကွင်ဟိုမပါဝင်တာကြောင့် အသင်းခေါင်းဆောင်အဖြစ် ဦးဆောင်ခဲ့ရတာပါ။ပီအက်စ်ဂျီအသင်းဟာ မာကွင်ဟိုမပါဝင်ရင် ကင်မ်ပန်ဘီနဲ့ ဗာရတ်တီတို့ကို ဒုတိယနဲ့ တတိယအသင်းခေါင်းဆောင်တွေအဖြစ် သတ်မှတ်ထားတာဖြစ်ပါတယ်။
ဒီပွဲအပြီးမှာ နည်းပြ ဂယ်လ်တီယာက ဘတ်ပီကို ဒုအသင်းခေါင်းဆောင်အဖြစ် ခန့်အပ်ထားတယ်လို့ ပြောခဲ့တာပါ။ကင်မ်ပန်ဘီကတော့ ဒါနဲ့ ပတ်သက်ပြီး သူ့ကို အသိပေးခဲ့ခြင်းမရှိဘူးလို့ ဆိုရှယ်မီဒီယာမှာ ရေးသားခဲ့တာဖြစ်ပါတယ်။
ကင်မ်ပန်ဘီက “ကျွန်တော်ဟာ ပြီးခဲ့တဲ့ နာရီပိုင်းအတွင်းမှာ တော်တော်များများကို ကြားသိပြီးဖတ်နိုင်ခဲ့ပါတယ်။သတင်းအမှားတွေမပြန့်စေဖို့အတွက် ရှင်းရှင်းလင်းလင်းသိစေချင်ပါတယ်။ဒီဆုံးဖြတ်ချက်တွေကို ကျွန်တော်သတိမထားမိပါဘူး။ကလပ်ရဲ့ဆုံးဖြတ်ချက်တွေကို ကျွန်တော်အမြဲတမ်းလေးစားပါတယ်”လို့ အင်စတာဂရမ်မှာ ရေးသားခဲ့ပါတယ်။
ကင်မ်ပန်ဘီဟာ ဒဏ်ရာကြောင့် အနားယူနေရပြီး အသင်းခေါင်းဆောင်လက်ပတ်ကို အောက်တိုဘာ ၂၉ ရက်က ထရိုယတ်စ်နဲ့ပွဲမှာ ဝတ်ဆင်ခဲ့တာဖြစ်ပါတယ်။
