မက်ဆီဟာ ပီအက်စ်ဂျီအသင်းက အော်ဇေးအသင်းကို အနိုင်ရခဲ့တဲ့ လီဂူးဝမ်းပွဲစဉ်မှာ ဘတ်ပီသွင်းယူခဲ့တဲ့ဂိုးကို ဖန်တီးခဲ့ပြီးနောက် စံချိန်တစ်ခုကို တင်နိုင်ခဲ့ပါတယ်။
ဒါကတော့ မက်ဆီဟာ ဒီရာသီပြိုင်ပွဲစုံ သွင်းဂိုး ၂၀ နဲ့အထက်၊ ဂိုးဖန်တီးမှု ၂၀ နဲ့ အထက် ပြုလုပ်နိုင်တဲ့ ဥရောပထိပ်တန်း ၅ လိဂ်ရဲ့တစ်ဦးတည်းသောကစားသမားအဖြစ် မှတ်တမ်းတင်နိုင်ခဲ့ပါတယ်။
မက်ဆီဟာ ပီအက်စ်ဂျီပရိသတ်တွေရဲ့လှောင်ပြောင်မှုကို ခံခဲ့ရပေမယ့် ဒီရာသီမှာ အသင်းအတွက် ခြေစွမ်းပြသနေပြီး အခုလိုမျိူး ဥရောပထိပ်တန်းလိဂ်တွေမှာ ဘယ်သူမှ မလုပ်နိုင်တဲ့ စံချိန်မျိုးကို တင်နိုင်ခဲ့တာပါ။
ပီအက်စ်ဂျီအသင်းဟာ တိုက်စစ်မှူး ဘတ်ပီသွင်းယူတဲ့ ၂ ဂိုးနဲ့ ဒီပွဲမှာ အော်ဇေးအသင်းကို ၂ ဂိုး- ၁ ဂိုးနဲ့ အနိုင်ရခဲ့ပြီး လီဂူးဝမ်းဖလားရယူနိုင်ဖို့ အခြေအနေကောင်းတွေပိုင်ဆိုင်သွားပြီဖြစ်ပါတယ်။
ပီအက်စ်ဂျီအသင်းဟာ လက်ကျန် ၂ ပွဲမှာ ရမှတ် ၁ မှတ်ရတာနဲ့ ချန်ပီယံဆုကို ရယူနိုင်တော့မှာပါ။ပီအက်စ်ဂျီအသင်းဟာ ချန်ပီယံဆုကို ရယူနိုင်မှာဖြစ်ပေမယ့် မက်ဆီကတော့ ရာသီအကုန်မှာ အသင်းကနေ ထွက်ခွာဖို့ ရှိနေပြီဖြစ်ပါတယ်။
