ပွဲပယ်ပြစ်ဒဏ်ကနေ ပြန်ရုပ်သိမ်းပြီးနောက် အေဂျက်စီယိုနဲ့ ကစားခဲ့တဲ့ လီဂူးဝမ်းပွဲစဉ်မှာ ပီအက်စ်ဂျီအတွက် ပွဲစကတည်းက ပါဝင်ခဲ့တဲ့ မက်ဆီဟာ အသင်းပရိသတ်တွေရဲ့လှောင်ပြောင်မှုတွေကို ခံခဲ့ရပါတယ်။
မက်ဆီဟာ အသင်းခွင့်ပြုချက်မရဘဲ ဆော်ဒီသွားခဲ့လို့ ၂ ပတ်ကြာပွဲပယ်ပြစ်ဒဏ်ချမှတ်ထားခဲ့ပေမယ့် အသင်းနဲ့ အသင်းဖော်တွေကို ပြန်တောင်းပန်ခဲ့တာကြောင့် လေ့ကျင့်ခန်းဆင်းခွင့်ရခဲ့ပြီး အေဂျက်စီယိုနဲ့ ပွဲမှာ အသင်းအတွက် ပြန်လည်ပါဝင်ခွင့်ရခဲ့တာဖြစ်ပါတယ်။
ဒီပွဲမှာ ပီအက်စ်ဂျီပရိသတ်တွေဟာ ပွဲကစားမယ့်လူစာရင်းကို ကြေညာချိန် မက်ဆီရဲ့နာမည်ရောက်တဲ့အချိန်မှာ လှောင်ပြောင်ခဲ့ကြတာဖြစ်ပြီး ဒါတင်မကသေးဘဲ မက်ဆီရဲ့ ပထမဆုံးဘောလုံးထိတဲ့ အချိန်မှာလည်း လှောင်ပြောင်ခဲ့ကြတာပါ။
မက်ဆီဟာ ဒီရာသီမှာ ပီအက်စ်ဂျီပရိသတ်တွေရဲ့လှောင်ပြောင်မှုကို မကြာခဏခံနေရပြီး အဲ့ဒါကြောင့်လည်း စာချုပ်ကုန်ဆုံးမယ့် ရာသီအကုန်မှာ ပြင်သစ်ကလပ်ကနေ ထွက်ခွာဖို့ ဆုံးဖြတ်ခဲ့တာလည်း ဖြစ်ပါတယ်။
ပီအက်စ်ဂျီအသင်းဟာ ဒီပွဲမှာ အေဂျက်စီယိုအသင်းကို ၅ ဂိုး- ဂိုးမရှိနဲ့ ဂိုးပြတ်အနိုင်ရခဲ့ပြီး လီဂူးဝမ်းဆုဖလား ရယူနိုင်ဖို့အတွက်နီးစပ်သွားခဲ့ပြီဖြစ်ပါတယ်။
