မက်ဆီဟာ လော်ရီးယန့်အသင်းကို အရေးနိမ့်ပြီးနောက် ဆော်ဒီနိုင်ငံကို သွားရောက်ခဲ့တာမှာ အသင်းရဲ့ခွင့်ပြုချက်မရပဲသွားရောက်ခဲ့လို့ ၂ ပတ်ကြာပွဲပယ်ပြစ်ဒဏ်ချမှတ်ခံလိုက်ရပြီဖြစ်ပါတယ်။
မက်ဆီဟာ အိမ်ကွင်းပွဲစဉ်မှာ ပွဲချိန်ပြည့်ပါဝင်ကစားခဲ့ပြီး နောက်တစ်ရက်အကြာမှာ အသင်းနဲ့ လေ့ကျင့်မှုပြုလုပ်ခဲ့ခြင်းမရှိဘဲ ဆော်ဒီနိုင်ငံကို မိသားစုနဲ့အတူ သွားရောက်ခဲ့တာပါ။ဒီလိုသွားရောက်ခဲ့ချိန်မှာ နည်းပြ ဂယ်လ်တီယာနဲ့ အားကစားဒါရိုက်တာ ကမ်ပို့စ်တို့ကို အသိပေးခဲ့ခြင်းမရှိတာဖြစ်ပါတယ်။
အဲ့ဒါကြောင့် မက်ဆီဟာ အသင်းရဲ့ပွဲပယ်ပြစ်ဒဏ်ချမှတ်ခဲ့တဲ့ ၂ ပတ်အတွင်းမှာ လေ့ကျင့်ခန်းလည်းပြုလုပ်လို့ရမှာမဟုတ်သလို၊ ကစားလို့လည်းရမှာမဟုတ်ပါဘူး။ဒါ့အပြင် ဒီကာလအတွင်းမှာ အသင်းဘက်က မက်ဆီရဲ့လုပ်ခလစာကို ဖြတ်တောက်တဲ့ ဒဏ်ကြေးငွေကိုလည်း ချမှတ်သွားမယ်လို့ သိရပါတယ်။
မက်ဆီနဲ့ ပီအက်စ်ဂျီအသင်းတို့ချူပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးမှာဖြစ်ပြီး စာချုပ်သစ်အတွက် သဘောတူညီမှုမရတာကြောင့် ထွက်ခွာရဖို့ ရှိနေပြီး ဒီလိုအခြေအနေကြောင့် ထွက်ခွာဖို့အတွက် ပိုပြီးသေချာသွားနိုင်တာလည်းဖြစ်ပါတယ်။
မက်ဆီကို ခေါ်ယူဖို့ လက်ရှိအချိန်မှာ အသင်းဟောင်း ဘာစီလိုနာအသင်းက ရေပန်းစားနေပြီး စပိန်ကလပ်ဟာ မက်ဆီကို ပြန်လည်ခေါ်ယူဖို့ လာလီဂါနဲ့ ဆွေးနွေးနေတယ်လို့ သိရပါတယ်။
