အေစီမီလန် တိုက်စစ်မှူးကြီး အီဘရာဟီမိုဗစ်က ရီးရဲလ်မက်ဒရစ်နဲ့ ပြင်သစ်လက်ရွေးစင် တိုက်စစ်မှူး ဘန်ဇီမာ ဘလွန်းဒီအော်ရသွားတဲ့အပေါ် သူပြောခဲ့တဲ့ စကားတွေ မှန်ကန်ကြောင်း ပြင်သစ်မီဒီယာတွေကို ပြန်လည် ထိုးနှက်လိုက်ပါတယ်။
ဘန်ဇီမာဟာ ပြီးခဲ့တဲ့ရာသီမှာ ရီးရဲလ်မက်ဒရစ်နဲ့အတူ ဆုဖလားလေးလုံးရရှိအောင် စွမ်းဆောင်နိုင်ခဲ့ပြီး (၂၀၂၂) ရဲ့ ဘလွန်းဒီအော်ဆုကိုလည်း အငြင်းပွားဖွယ်မရှိ ဆွတ်ခူးနိုင်ခဲ့ပါတယ်။
ဒီလိုမျိုး ဘန်ဇီမာနဲ့ ပတ်သက်လို့ အီဘရာဟီမိုဗစ်က “အခု ဘန်ဇီမာ ဘလွန်းဒီအော်ရသွားပြီဆိုတော့ ဂျာနယ်လစ်တွေက ဘာပြောလဲဗျ။ ပြီးခဲ့တဲ့ ရုရှားကမ္ဘာ့ဖလားတုန်းက ကျနော် ပြောခဲ့တာရှိပါတယ်”
“ဘန်ဇီမာက ပြင်သစ်လက်ရွေးစင်အသင်းမှာ ပါဝင်ခွင့်ရဖို့ ထိုက်တန်တယ်ဆိုပြီးတော့ပေါ့။ ကျနော် အဲ့ဒီလိုပြောလို့ဆိုပြီး ပြင်သစ်ဂျာနယ်လစ်တွေက ကျနော့်ကို တိုက်ခိုက်ကြတယ်ဗျာ”
“အခု ဘန်ဇီမာ ဘလွန်းဒီအော်ရပါပြီ။ ဒီဂျာနယ်လစ်တွေ ဘာတွေးနေမလဲ ကျနော် သိချင်ပါတယ်” လို့ ပြောကြားခဲ့ပါတယ်။ ဒါ့အပြင် သူ့ရဲ့ ကလပ်အသင်းဖော် ဂျရူး ကာတာကမ္ဘာ့ဖလားမှာ ပါဝင်ခွင့်ရသင့်ကြောင်းလည်း အီဘရာဟီမိုဗစ်က ပြောပါတယ်။
အီဘရာဟီမိုဗစ်က “ဂျရူးက တနှစ်ကို ဂိုး (၄၀) လောက် မသွင်းနိုင်ပေမယ့် အသင်းအတွက် အခြားသူတွေ မလုပ်ပေးနိုင်တဲ့အရာမျိုးကို လုပ်ပေးနိုင်ပါတယ်”
“အသင်းက သူ့ကို တည်ကစားရတာမျိုး မဟုတ်ဘဲ သူက အသင်းအတွက် ကစားပေးတာပါ။ သူက ကာတာကမ္ဘာ့ဖလားမှာ အရွေးခံရဖို့ ထိုက်တန်ပါတယ်” လို့ ပြောကြားသွားခဲ့ပါတယ်။
