အာဆင်နယ်အသင်းဟာ ဒီမနက်ကစားခဲ့တဲ့ ပရီးမီးယားလိဂ်ပွဲစဉ်မှာ ဝက်စ်ဟမ်းအသင်းကို ၂ ဂိုး- ဂိုးမရှိနဲ့ အရေးနိမ့်ခဲ့ပြီး အဆင့် ၁ နေရာကို လီဗာပူးလ်အသင်းထံ ပေးခဲ့ရပြီးမှာ ဒီပွဲမှာ အာဆင်နယ်အသင်းအနိုင်ရဖို့ မလုံလောက်ခဲ့ဘူးလို့နည်းပြ အာတီတာကပြောခဲ့ပါတယ်။
အာဆင်နယ်အသင်းဟာ ဒီပွဲမှာ ဂိုးပေါက်ကန်သွင်းမှုအကြိမ်(၃၀)အထိရှိခဲ့ပြီး ဝက်စ်ဟမ်းဂိုးဧရိယာထဲမှာ ဘောလုံးထိချက်(၇၇)ကြိမ်အထိရှိခဲ့ပေမယ့် ဂိုးရအောင်တော့ လုပ်ဆောင်နိုင်ခဲ့ခြင်းမရှိတာပါ။အာဆင်နယ်အသင်းဟာ ဝက်စ်ဟမ်းအသင်းကို ကာရာဘောင်းဖလားပြိုင်ပွဲမှာလည်း အရေးနိမ့်ထားတာကြောင့် ဒီရာသီတွေ့ဆုံခဲ့တဲ့ ၂ ကြိမ်စလုံး ဝက်စ်ဟမ်းအသင်းကို အရေးနိမ့်ခဲ့တာဖြစ်ပါတယ်။
ဒီပွဲမှာ ဝက်စ်ဟမ်းအသင်းကွင်းလယ်လူ ဆူချက်ခ်သွင်းယူခဲ့တဲ့ဂိုးမှာ ဘောလုံးပေးပို့ခဲ့တဲ့ ဘိုဝင်ရဲ့ပေးပို့မှုဟာ စည်းကျော်ခဲ့ပေမယ့် ဒါကိုပြသနိုင်ဖို့ တိကျတဲ့အထောက်အထားမရှိတာကြောင့် ကွင်းလယ်ဒိုင်လူကြီးက ဂိုးကို ခွင့်ပြုခဲ့တာပါ။အာတီတာကတော့ သူတို့အနိုင်ရဖို့ အခွင့်အရေးတွေအများကြီးရခဲ့တယ်လို့ ပြောခဲ့ပါတယ်။
အာတီတာက “ကျနော်တို့ဒီပွဲမှာ ဂိုးကန်သွင်းမှုအကြိမ်(၃၀)ရခဲ့ပေမယ့် ဂိုးမရခဲ့ပါဘူး။ဒါကြောင့် အကြိမ် ၅၀ ၊ ၆၀ လောက်ကန်ပြီး ဂိုးရအောင်ပြုလုပ်ရမှာပါ။ကျနော်တို့ဟာ ဝက်စ်ဟမ်းဂိုးဧရိယာမှာ ထိချက်များပြီး ပွဲကိုလည်း ကြီးစိုးနိုင်ခဲ့ပေမယ့် အနိုင်ရအောင်တော့ မပြုလုပ်နိုင်ခဲ့ပါဘူး။ဒီပွဲမှာ ကျနော်တို့ အနိုင်ရဖို့ မလုံလောက်ခဲ့ပါဘူး”လို့ ဆိုခဲ့ပါတယ်။
