မန်စီးတီးအသင်းနည်းပြ ဂွာဒီယိုလာက အဲဗာတန်အသင်းကို အနောက်ကနေလိုက်ကစားပြီး ၃ ဂိုး-၁ ဂိုးနဲ့ အနိုင်ရပြီးနောက် ဒါကြောင့်လည်း မန်စီးတီးအသင်းက ကမ္ဘာ့ချန်ပီယံဖြစ်နေတာလို့ ပြောလိုက်ပါတယ်။
မန်စီးတီးအသင်းဟာ ဒီပွဲမှာ ဟာရစ်ဆင်ရဲ့သွင်းဂိုးနဲ့ အဲဗာတန်အသင်းရဲ့ဦးဆောင်ခြင်းခံခဲ့ရပေမယ့် ဖိုဒန်၊အယ်လ်ဗားရက်ဇ်နဲ့ ဘာနာဒိုဆေးလ်ဗားတို့က အနိုင်ဂိုးသွင်းယူပေးခဲ့တာပါ။ဒီပွဲဟာ ဖီဖာကလပ်ကမ္ဘာ့ဖလားချန်ပီယံဆုကို ရရှိပြီးနောက် မန်စီးတီးအသင်းအတွက် ပထမဆုံးကစားတဲ့ပွဲလည်း ဖြစ်ပါတယ်။
မန်စီးတီးအသင်းဟာ ဒီနိုင်ပွဲကြောင့် နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ နိုင်ပွဲပျောက်ဆုံးတာကို အဆုံးသတ်ပေးနိုင်ခဲ့တာပါ။မန်ချက်စတာကလပ်ဟာ ဒီနိုင်ပွဲကြောင့် အဆင့် ၁နေရာက လီဗာပူးလ်အသင်းနဲ့ ၅ မှတ်အကွာ ၁ ပွဲနဲ့ အဆင့် ၄ နေရာမှာ ရပ်တည်နေတာဖြစ်ပါတယ်။
ဂွာဒီယိုလာက “ကျနော်တို့က ကမ္ဘာ့ချန်ပီယံအသင်းနဲ့ ကမ္ဘာ့အကောင်းဆုံးအသင်း ဘာကြောင့်ဖြစ်နေလဲဆိုတာ ဒီလိုနိုင်ပွဲရယူနိုင်တာကြောင့်ပါ။ကျနော်ဒီအကြောင်းကို နေ့တိုင်းပြောပြီး ကစားသမားတွေကို သတိပေးနေတာပါ။ကျနော်တို့ရဲ့အဆင့်အတန်းတွေကို ဆက်ပြီးထိန်းသိမ်းရပါမယ်။ဒါကို အောက်ကျအောင်လုပ်လို့မရဘူး”လို့ဆိုခဲ့ပါတယ်။
