မန်စီးတီးအသင်းနည်းပြ ဂွာဒီယိုလာက ဒီရာသီအကုန်မှာ လီဗာပူးလ်အသင်းကနေ ကလောပ့်ထွက်ခွာတော့မှာဖြစ်တာကြောင့် သူအိပ်လို့ပိုကောင်းတော့မယ်လို့ ပြောလိုက်ပါတယ်။
လီဗာပူးလ်အသင်းနည်းပြ ကလောပ့်ဟာ ဒီရာသီအကုန်မှာ ၉ နှစ်ကြာရှိခဲ့တဲ့ အသင်းကနေ ထွက်ခွာတော့မယ်လို့ မနေ့က ကြေညာသွားခဲ့တာပါ။ကလောပ့်ဟာ လီဗာပူးလ်အသင်းနဲ့ ဆုဖလားအားလုံးရယူပြီးနောက်မှာ သူ့ရဲ့စွမ်းအင်တွေကုန်ခမ်းသွားပြီလို့ ယူဆရတာကြောင့် ထွက်ခွာဖို့ ဆုံးဖြတ်ခဲ့တာလို့ ပြောခဲ့တာဖြစ်ပါတယ်။
ကလောပ့်နဲ့ ဂွာဒီယိုလာတို့ဟာ ပရီးမီးယားလိဂ်ပြိုင်ပွဲမှာ အဓိကပြိုင်ဘက်အဖြစ် ရှိခဲ့တာတင်မဟုတ်ဘဲ ဘိုင်ယန်မြူးနစ်နဲ့ ဒေါ့မွန်အသင်းကို ကိုင်တွယ်ချိန်ကလည်း အဓိကပြိုင်ဘက်အဖြစ် ရှိခဲ့ကြတာပါ။ဂွာဒီယိုလာကတော့ ဒါကို သူလွမ်းဆွတ်နေတော့မယ်လို့ ဆိုခဲ့ပါတယ်။
ဂွာဒီယိုလာက “လီဗာပူးလ်နဲ့ ပွဲမတိုင်ခင်ဆို အိပ်မက်ဆိုးတွေမက်ခဲ့ရတာကြောင့် အခုအိပ်လို့ပိုကောင်းတော့မှာပါ။သူကလည်း ဒါကို လွမ်းနေမှာဖြစ်သလို ကျနော်တို့လည်း ဒါကိုလွမ်းနေမှာပါ။သူနဲ့ လီဗာပူးလ်မပါဘဲ ကျနော်တို့ဒီမှာအတူတူရှိခဲ့တဲ့အချိန်ကို သတ်မှတ်လို့ရမှာမဟုတ်သလို ဖြစ်လည်းဖြစ်နိုင်မှာမဟုတ်ပါဘူး။သူက ကျနော့်ရဲ့အဓိကပြိုင်ဘက်ပါ။သူအကောင်းဆုံးဖြစ်ဖို့ ကျနော်ဆုတောင်းပါတယ်”လို့ ဆိုခဲ့ပါတယ်။
ကလောပ့်ကတော့ လီဗာပူးလ်အသင်းကနေ ထွက်ခွာအပြီးမှာ နည်းပြလောကက အနားယူနိုင်တယ်လို့ ပြောခဲ့ပေမယ့် ဂွာဒီယိုလာက ထပ်ပြီးတွေ့နိုင်မယ်လို့ ယုံကြည်နေတာဖြစ်ပါတယ်။