ဖူလ်ဟမ်အသင်းနည်းပြ မာကိုဆေးလ်ဗားက ဘုန်းမောက်အသင်းကို ၃ ဂိုး- ဂိုးမရှိနဲ့ အရေးနိမ့်ခဲ့တဲ့ပွဲစဉ်မှာ ဘုန်းမောက်အသင်းရဲ့ဘောကောက်ကလေးငယ်ကို တွန်းထုတ်ခဲ့တဲ့ ဂိုးသမား လီနိုကို ကာကွယ်တဲ့ စကားပြောခဲ့ပါတယ်။
ဒီပွဲစဉ်မှာ ဘုန်းမောက်အသင်းက ဖူလ်ဟမ်အသင်းကို ၂ ဂိုး- ဂိုးမရှိနဲ့ ဦးဆောင်နေချိန်မှာ လီနိုက ပွဲကို အမြန်ဆုံးပြန်စတင်ချင်တဲ့အတွက် ဘောကောက်ကလေးငယ်ဆီက ဘောလုံးကို အလျင်အမြန်ရယူပြီး အဆိုပါ ကလေးငယ်ကို တွန်းထုတ်ခဲ့တာပါ။လီနိုဟာ ဒီအဖြစ်အပျက်မတိုင်ခင်ကတည်းက အဝါကတ်ပြသခံထားရပေမယ့် အနီကတ်ပြသထုတ်ပယ်ခံရမယ့်အရေးကို ရှောင်ရှားနိုင်ခဲ့တာဖြစ်ပါတယ်။
လီနိုဟာ နောက်ပိုင်းမှာ အဆိုပါကလေးငယ်ကို တောင်းပန်ခဲ့ပေမယ့် ဘုန်းမောက်အသင်း ပရိသတ်တွေရဲ့လှောင်ပြောင်မှုကို ခံခဲ့ရတာပါ။မာကိုဆေးလ်ဗားကတော့ လီနိုဟာ ဘုန်းမောက်ဘောကောက်ကလေးငယ်ကို တွန်းထုတ်ခဲ့ခြင်းမရှိဘူးလို့ ဆိုခဲ့ပါတယ်။
မာကိုဆေးလ်ဗားက “ဒီအခိုက်အတန့်ကို ကျနော်မြင်ခဲ့ရပါတယ်။ဒါက သူတို့ဘက်က ညွှန်ကြားထားတဲ့အရာဟုတ်လား၊မဟုတ်ဘူးလားဆိုတာ မသိပေမယ့် ဘောကောက်ကောင်လေးတွေက အမြဲတမ်းနှောင့်နှေးအောင်ပြုလုပ်ပါတယ်။လီနိုက ဘောလုံးကို အမြန်ကစားချင်တာကြောင့် သူ့ဆီကနေ ဘောလုံးရယူခဲ့တာပါ။သူ မတွန်းခဲ့ပါဘူး။သူက ထိပ်တန်းပရော်ဖက်ရှင်နယ်သမားတစ်ဦးပါ”လို့ ဆိုခဲ့တာဖြစ်ပါတယ်။
