ယူနိုက်တက်အသင်းက အက်စတွန်ဗီလာအသင်းကို ၃ ဂိုး- ၂ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ပထမဆုံးပရီးမီးယားလိဂ်သွင်းဂိုး သွင်းယူနိုင်ခဲ့တဲ့ တိုက်စစ်မှူး ဟော့ဂျ်လန်းက နောက်ထပ်သွင်းဂိုးတွေ ထပ်ပြီးသွင်းယူနိုင်ဖို့ မျှော်လင့်တယ်လို့ ဆိုခဲ့ပါတယ်။
ပြီးခဲ့တဲ့ နွေရာသီက အတ္တလန်တာအသင်းကနေ ပြောင်းရွှေ့လာခဲ့တဲ့ ဟော့ဂျ်လန်းဟာ ချန်ပီယံလိဂ်ပြိုင်ပွဲမှာ သွင်းဂိုးတွေသွင်းယူနိုင်ခဲ့ပေမယ့် ပရီးမီးယားလိဂ်ပြိုင်ပွဲမှာ ဂိုးမသွင်းနိုင်တာကြောင့် ဝေဖန်မှုတွေခံခဲ့ရတာပါ။ဒါကို ဟော့ဂျ်လန်းဟာ အက်စတွန်ဗီလာအသင်းနဲ့ ပွဲစဉ်မှာ အဆုံးသတ်နိုင်ခဲ့တာဖြစ်ပါတယ်။
ဟော့ဂျ်လန်းက “အခုအချိန်မှာ ကျနော်ဟာ အပျော်ရွှင်ဆုံးလူသားပါပဲ။ပရီးမီးယားလိဂ်သွင်းဂိုးရဖို့စောင့်ဆိုင်းခဲ့ရပေမယ့် ကျနော်ပျော်ရွှင်ပါတယ်။ကျနော်ရဲ့အောင်ပွဲခံပုံကို ကြည့်ရင် ခင်ဗျားတို့မြင်တွေ့ရမှာပါ။ကျနော်တို့ဟာ နောက်ဆုံးအချိန်ထိ ယုံကြည်မှုရှိခဲ့ပြီး စရိုက်လက္ခဏာတွေကိုလည်း ပြသခဲ့ပါတယ်။နောက်ထပ်ဂိုးတွေထပ်ပြီးသွင်းယူနိုင်ဖို့ မျှော်လင့်တယ်”လို့ ဆိုခဲ့ပါတယ်။
ယူနိုက်တက်အသင်းဟာ ဒီနိုင်ပွဲကြောင့် ပရီးမီးယားလိဂ်အဆင့် ၆ နေရာကို တက်လှမ်းနိုင်ခဲ့ပြီး အခုလာမယ့်ပွဲစဉ်အဖြစ် နော်တင်ဂမ်ဖောရက်စ်အသင်းနဲ့ ယှဉ်ပြိုင်ရမှာဖြစ်ပါတယ်။