ပြိုင်ပွဲစုံနောက်ဆုံး ၄ ပွဲဆက်တိုက်နိုင်ပွဲပျောက်ဆုံးပြီး သွင်းဂိုးတွေပါ ရရှိဖို့ ရုန်းကန်နေရတဲ့ ယူနိုက်တက်အသင်းအနေနဲ့ ဗီလာအသင်းနဲ့ ပွဲစဉ်မှာ အနိုင်ရဖို့ လိုအပ်နေပြီလို့ ယူနိုက်တက်အသင်းနည်းပြ အဲရစ်တန်ဟတ်က ပြောလိုက်ပါတယ်။
ယူနိုက်တက်အသင်းဟာ ဒီရာသီ ပြိုင်ပွဲစုံ ၂၆ ပွဲမှာ ၁၃ ပွဲအထိ အရေးနိမ့်ထားပြီး ပရီးမီးယားလိဂ် ၂ ပွဲဆက်အရေးနိမ့်ကာ အဆင့် ၈ နေရာမှာ ရပ်တည်နေတာပါ။ယူနိုက်တက်အသင်းဟာ မနက်ဖြန်မနက်ပိုင်းမှာ ဘောက်ဆင်ဒေးပွဲစဉ်အဖြစ် အက်စတွန်ဗီလာအသင်းနဲ့ ယှဉ်ပြိုင်ရမှာဖြစ်လို့ အခက်အခဲတွေနဲ့ ရင်ဆိုင်ရဖွယ်ရှိနေတာဖြစ်ပါတယ်။
အဲရစ်တန်ဟတ်က “ဗီလာက အရမ်းကောင်းတဲ့ပုံစံနဲ့ ခြားနားတဲ့အသင်းပါ။သူတို့က အလွန်ကောင်းမွန်တဲ့အသင်းပါ။ခင်ဗျားတို့အနေနဲ့ အခွင့်အရေးတွေကို ဖန်တီးနေပြီး ဒါကို မရယူနိုင်ဘူးဆိုရင် ပွဲတွေကို အနိုင်ရမှာမဟုတ်ပါဘူး။ဒါက ရှင်းပါတယ်။ယူနိုက်တက်ရဲ့စံနှုန်းက ဘယ်လိုလဲဆိုတာ ကျွန်တော်တို့ သိပါတယ်”
“အသင်းတစ်သင်းအနေနဲ့ ကျွန်တော်တို့ အနိုင်ရဖို့လိုအပ်နေပါတယ်။အဲ့ဒါကြောင့် အားလုံး ရာနှုန်းပြည့်ပူးပေါင်းပါဝင်ဆောင်ရွက်ရမှာပါ”လို့ ဆိုခဲ့ပါတယ်။ဗီလာအသင်းဟာ ဒီရာသီမှာ အလွန်ခြေစွမ်းပြသနေပြီး အာဆင်နယ်နဲ့ မန်စီးတီးအသင်းတို့ကို အနိုင်ရလဒ်ရယူထားတာဖြစ်ပါတယ်။