ချယ်လ်ဆီးအသင်းနည်းပြ ပိုချက်တီနိုက မယ်ဒယ်ဘရော့အသင်းကို နှစ်ကျော့ပေါင်းရလဒ် ၆ ဂိုး-၂ ဂိုးနဲ့ အနိုင်ရပြီး ကာရာဘောင်းဖလားဗိုလ်လုပွဲတက်နိုင်ခဲ့ပြီးနောက် ဒီဆုဖလားကို အရယူပြီး အင်္ဂလန်မှာ ဆုဖလားမရသေးတာကို အဆုံးသတ်မယ်လို့ ဆိုခဲ့ပါတယ်။
ပိုချက်တီနိုဟာ ချယ်လ်ဆီးအသင်းကို မကိုင်တွယ်ခင်က ပရီးမီးယားလိဂ်ကလပ်တွေဖြစ်တဲ့ ဆောက်သမ်တန်နဲ့ စပါးအသင်းတို့ကို ကိုင်တွယ်ခဲ့ပေမယ့် ဆုဖလားမရယူနိုင်ခဲ့ပါဘူး။ပိုချက်တီနိုဟာ စပါးအသင်းနဲ့ ကာရာဘောင်းဖလားဗိုလ်လုပွဲ၊ချန်ပီယံလိဂ်ဗိုလ်လုပွဲတက်နိုင်ခဲ့ပေမယ့် ဆုဖလားမရယူနိုင်ခဲ့တာပါ။
အဲ့ဒါကြောင့် ချယ်လ်ဆီးအသင်းကို ကိုင်တွယ်ချိန်မှာ အနီးစပ်ဆုံးဖြစ်နေတဲ့ ကာရာဘောင်းဖလားကို ရယူပြီး အင်္ဂလန်မှာဆုဖလားမရယူနိုင်သေးတာကို အဆုံးသတ်ဖို့ စိတ်အားထက်သန်နေတာဖြစ်ပါတယ်။ပိုချက်တီနိုက “ဒီမှာဆုဖလားရယူနိုင်ဖို့ စိတ်အားထက်သန်နေပါတယ်။ပီအက်စ်ဂျီမှာရှိခဲ့တဲ့ တစ်နှစ်ခွဲအတွင်းမှာ ဆုဖလား ၃ လုံးရယူနိုင်ခဲ့ပါတယ်”
“အဲ့ဒါကြောင့် ဒီမှာလည်း ဆုဖလားရယူချင်ပါတယ်။ကျနော်ဆုဖလားရယူနိုင်ဖို့ စိတ်အားထက်သန်နေပါတယ်”လို့ ဆိုခဲ့ပါတယ်။ရာသီအစပိုင်းမှာ ရလဒ်တွေမကောင်းခဲ့တဲ့ ချယ်လ်ဆီးအသင်းဟာ နောက်ဆုံးကစားခဲ့တဲ့ ပြိုင်ပွဲစုံ ၆ ပွဲမှာ ၅ ပွဲအထိအနိုင်ရပြီး ရလဒ်ကောင်းတွေရယူနေတာဖြစ်ပါတယ်။