ဘုန်းမောက်အသင်းနဲ့ ကစားခဲ့တဲ့ ပရီးမီးယားလိဂ်ပွဲစဉ်မှာ နှလုံးရပ်ပြီး ကွင်းအတွင်းလဲကျခဲ့တဲ့ လူတန်အသင်းခေါင်းဆောင် တွမ်လော့ခ်ယာဟာ ဆေးရုံကဆင်းပြီး အိမ်ကိုပြန်ရောက်ရှိနေပြီလို့ လူတန်အသင်းက အတည်ပြုခဲ့ပါတယ်။
တွမ်လော့ခ်ဟာ နှလုံးခုန်နှုန်းထိန်းတဲ့စက်တပ်ဆင်ခဲ့ရတယ်လို့ လူတန်အသင်းက ပြောခဲ့တာပါ။ပြီးခဲ့တဲ့မေလက ချန်ပီယံရှစ်ပလေးအောဖ့်ပွဲစဉ်မှာလည်း တွမ်လော့ခ်ယာဟာ လဲကျခဲ့ပေမယ့် ဒီဖြစ်ရပ်၂ ခုက ကွာခြားတယ်လို့ လူတန်အသင်းရဲ့ထုတ်ပြန်ချက်မှာ ဖော်ပြထားပါတယ်။တွမ်လော့ခ်ယာ အိမ်မှာ ပြန်လည်ထူထောင်ရေးလုပ်ငန်းစဉ်တွေကို စတင်လုပ်ဆောင်ရတော့မှာပါ။
ဘုန်းမောက်နဲ့လူတန်အသင်းတို့ပွဲစဉ်ကို ပွဲချိန် ၅၉ မိနစ်မှာ ဖျက်ခဲ့ပေမယ့် ပရီးမီးယားလိဂ်က ဒီပွဲစဉ်ကို ပွဲချိန်ပြည့်ပြန်ကစားမယ်လို့ ကြေညာခဲ့ပါတယ်။လူတန်အသင်းဟာ ဒီဖြစ်ရပ်ကို ပထမဆုံးတွေ့ရှိခဲ့တဲ့ ဘုန်းမောက်အသင်းကွင်းလယ်လူ ဘီလင်းနဲ့ ဘုန်းမောက်အသင်း ဆေးအဖွဲ့ဝင်တွေကို ကျေးဇူးတင်တယ်လို့ ဆိုခဲ့ပါတယ်။
တွမ်လော့ခ်ယာ လူတန်အသင်း ပရီးမီးယားလိဂ်ကို တန်းတက်ရာမှာ အရေးပါတဲ့သူအဖြစ် ခြေစွမ်းပြသနိုင်ခဲ့ပေမယ့် ဒီဖြစ်ရပ်ကြောင့် ကစားသမားဘ၀ ဆက်ပြီးရှေ့ဆက်နိုင်မလားဆိုတာ စောင့်ကြည့်ရမှာဖြစ်ပါတယ်။