လီဗာပူးလ်အသင်းနည်းပြ ကလောပ့်က ဝက်စ်ဟမ်းအသင်းကို ၅ ဂိုး-၁ ဂိုးနဲ့ အနိုင်ရရှိခဲ့တဲ့ ကာရာဘောင်းဖလားကွာတားဖိုင်နယ်ပွဲစဉ်အပြီးမှာ အသင်းပရိသတ်တွေရဲ့အားပေးမှုကို ဝေဖန်မှုပြုလုပ်သွားခဲ့ပါတယ်။
လီဗာပူးလ်အသင်းဟာ ဝက်စ်ဟမ်းအသင်းကို အသာစီးနဲ့ ကစားပြီး ဂိုးပြတ်အနိုင်ရယူကာ ကာရာဘောင်းဖလား ဆီမီးဖိုင်နယ်အဆင့်ကို တက်ရောက်နိုင်ခဲ့တာပါ။ဒါပေမယ့် လီဗာပူးလ်အသင်း ပရိသတ်တွေရဲ့အားပေးမှုဟာ ကလောပ့်အတွက် စိတ်ပျက်စရာဖြစ်ခဲ့ရပါတယ်။
ကလောပ့်က “ပထမပိုင်းမှာ ကျနော့်ကစားသမားတွေ ကောင်းမွန်စွာကစားနိုင်ခဲ့ပေမယ့် ကျနော့်အနောက်မှာရှိတဲ့ ပရိသတ်တွေရဲ့အားပေးမှုကို မပျော်မရွှင်ဖြစ်ခဲ့ပါတယ်။သူတို့ဘာကိုလိုချင်လဲဆိုပြီး ကျနော်မေးခဲ့ပါတယ်။အာဆင်နယ်နဲ့ ပွဲမှာတော့ အန်ဖီးလ်ရဲ့အပြင်းအထန်အားပေးမှုကို လိုအပ်ပါတယ်”
“အာဆင်နယ်က ပွဲမကစားခဲ့ရတော့ ဒီပွဲကို သေသေချာချာပြင်ဆင်မယ်ဆိုတာ အားလုံးသိပါတယ်။ဒါကြောင့် ပွဲအစ ၁ စက္ကန့်ကနေ ပရိသတ်တွေရဲ့အပြင်းအထန်အားပေးမှုကို ကျနော်လိုချင်ပါတယ်။ဒီလိုမျိုးပုံစံမရှိဘူးဆိုရင်ခင်ဗျားတို့ရဲ့လက်မှတ်ကို အခြားသူတစ်ဦးဆီပေးလိုက်ပါ”လို့ ဆိုခဲ့ပါတယ်။
လီဗာပူးလ်အသင်းဟာ ကာရာဘောင်းဖလား ဆီမီးဖိုင်နယ်ပွဲစဉ်မှာတော့ ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပါတယ်။
