စပါးအသင်းက လက်စတာအသင်းကို ၆ ဂိုး- ၂ ဂိုးနဲ့ ဂိုးပြတ်အနိုင်ရခဲ့တဲ့ပွဲမှာ ဆွန်ဟောင်မင်ဟာ အသင်းအတွက် ဟတ်ထရစ်ဂိုးကို သွင်းယူသွားနိုင်ခဲ့ပါတယ်။
ပြီးခဲ့တဲ့ ပွဲတွေမှာ ဂိုးပေါက်ပျောက်ဆုံးနေခဲ့တဲ့ ဆွန်ဟောင်မင်ဟာ ဒီပွဲမှာတော့ လူစားဝင်ကစားသမားအဖြစ်သာ ပါဝင်ခွင့်ရခဲ့တာပါ။နည်းပြကွန်တီဟာ ဆွန်ဟောင်မင်ကို ပွဲချိန် ၅၉ မိနစ်မှ လူစားထည့်သွင်းခဲ့တာဖြစ်ပါတယ်။
ဆွန်ဟောင်မင်ဟာ လူစားဝင်လာပြီးအချိန်မှာ အသင်းအတွက် ခြေစွမ်းပြသနိုင်ခဲ့ပြီး ၇၃ မိနစ်၊ ၈၄ မိနစ်နဲ့ ၈၆ မိနစ်တွေမှာ စပါးအတွက် ဟတ်ထရစ်ဂိုးသွင်းယူခဲ့တာပါ။
ဆွန်ဟောင်မင်ဟာ ပရီးမီးယားလိဂ်ပြိုင်ပွဲမှာ လူစားဝင်ပြီး ဟတ်ထရစ်သွင်းတဲ့ စပါးအသင်းရဲ့ပထမဆုံးကစားသမားအဖြစ်လည်း မှတ်တမ်းတင်နိုင်ခဲ့ပါတယ်။
ဆွန်ဟောင်မင်က “ဒီရာသီ ကျွန်တော့်ရဲ့အဆုံးသတ်အပိုင်း ညံဖျင်းခဲ့သလို အနည်းငယ်လည်း ကံမကောင်းခဲ့ပါဘူး။ကျွန်တော်တကယ်ကို စိတ်ပျက်မိခဲ့ပါတယ်။ဂိုးတွေသွင်းလာနိုင်မယ်ဆိုတာ သိထားတဲ့အတွက် စိုးရိမ်မှုတော့ မရှိပါဘူး”
“ကျွန်တော်ဟာ ကြိုးစားပြီး အသင်းကို အမြဲတမ်းကူညီချင်ပါတယ်။အလွန်ကောင်းမွန်တဲ့ ပရိသတ်တွေနဲ့ ဝန်ထမ်းတွေဟာ ကျွန်တော့်အနောက်မှာ အမြဲတမ်းရှိနေပါတယ်။ဒါက ခက်ခဲကြမ်းတမ်းတဲ့ အခိုက်အတန့်တွေမှာ ကျွန်တော့်ကို အမြဲယုံကြည်စေခဲ့ပါတယ်”လို့ ပြောခဲ့ပါတယ်။
စပါးအသင်းဟာ ဒီနိုင်ပွဲကြောင့် ပရီးမီးယားလိဂ် အမှတ်ပေးဇယား အဆင့် ၂ နေရာမှာ ရပ်တည်နေတာဖြစ်ပါတယ်။