လီဗာပူးလ်အသင်းတိုက်စစ်ကစားသမား ဂတ်ပိုက ဒီနေ့ကစားမယ့် ယူနိုက်တက်အသင်းနဲ့ပွဲစဉ်မှာ မနှစ်ကလိုမျိုး ၇ ဂိုး- ဂိုးမရှိနဲ့ ထပ်ပြီးအနိုင်ရယူနိုင်ဖို့ မျှော်လင့်တယ်လို့ ပြောလိုက်ပါတယ်။
ပြီးခဲ့တဲ့နှစ်က အန်ဖီးလ်မှာတွေ့ဆုံခဲ့တဲ့ပွဲမှာ ဂတ်ပိုဟာ လီဗာပူးလ်အသင်းအတွက် ၂ ဂိုးသွင်းယူနိုင်ခဲ့တာပါ။ယူနိုက်တက်အသင်းဟာ လက်ရှိအချိန်မှာ ရလဒ်ဆိုးတွေကြောင့် ရုန်းကန်နေရတဲ့အတွက် လီဗာပူးလ်အသင်းဟာ ဒီလိုရလဒ်မျိုးထပ်ပြီးရယူနိုင်ဖို့ ဂတ်ပိုက မျှော်လင့်နေတာဖြစ်ပါတယ်။
ဂတ်ပိုက “ဒီပွဲက အလွန်ကောင်းမွန်တဲ့ပွဲပါ။ဒုတိယပိုင်းမှာ ကျနော်တို့ ပွဲကိုကြီးစိုးနိုင်ခဲ့ပြီး သွင်းဂိုးအများအပြားကို သွင်းယူနိုင်ခဲ့ပါတယ်။ပထမပိုင်းအပြီးမှာ သွင်းဂိုးကို မြန်မြန်ဆန်ဆန်ရယူနိုင်ခဲ့တာက ပွဲကိုအဆုံးအဖြတ်ဖြစ်ခဲ့တာဖြစ်ပြီး ကျနော်တို့အတွက် ကောင်းပါတယ်။ဒီနေ့မှာ ကျနော်တို့ ထပ်ပြီးလုပ်နိုင်မယ်လို့ မျှော်လင့်ကြောင်း”ဆိုခဲ့ပါတယ်။
လီဗာပူးလ်အသင်းဟာ ပရီးမီးယားလိဂ်ပြိုင်ပွဲရဲ့အဆင့် ၁ နေရာမှာ ဆက်လက်ရပ်တည်နိုင်ဖို့အတွက် ယူနိုက်တက်အသင်းကို အနိုင်ရယူဖို့ ပစ်မှတ်ထားနေတာပါ။ယူနိုက်တက်အသင်းကတော့ ရလဒ်ဆိုးနေတဲ့အပြင် အဓိက ကစားသမားတွေရဲ့ဒဏ်ရာကြောင့် ဒီပွဲမှာ ရုန်းကန်ရဖွယ်ရှိနေပါတယ်။
