ယူနိုက်တက်အသင်းဟာ နည်းပြ အဲရစ်တန်ဟတ်ကို ထုတ်ပယ်ခဲ့မယ်ဆိုရင် သူ့နေရာမှာ အစားထိုးဖို့အတွက် စပိန်၊ရီးရယ်လ်နဲ့ ဝုလ်ဗ်စ်အသင်းနည်းပြဟောင်း လိုပက်တီဂီကို နည်းပြသစ်အဖြစ် ခန့်အပ်ဖို့ စိတ်ဝင်စားနေတယ်လို့ သိရပါတယ်။
ယူနိုက်တက်အသင်းဟာ ဘိုင်ယန်မြူးနစ်အသင်းကို အရေးနိမ့်ခဲ့ပြီးနောက် ချန်ပီယံလိဂ်ပြိုင်ပွဲကနေ ထွက်ခွာရတာအပါအဝင် ဒီရာသီမှာ ရလဒ်ပိုင်းတွေမတည်မငြိမ်ဖြစ်နေတာကြောင့် နည်းပြ အဲရစ်တန်ဟတ်ရဲ့အနာဂတ်ကို စဉ်းစားနေပြီဖြစ်တာပါ။ဒီအချိန်မှာ ကလပ်လက်မဲ့ဖြစ်နေတဲ့ လိုပက်တီဂီနဲ့ ယူနိုက်တက်အသင်းတို့ရဲ့သတင်းတွေထွက်ပေါ်လာခဲ့တာဖြစ်ပါတယ်။
လိုပက်တီဂီဟာ ပရီးမီးယားလိဂ်ကလပ်အသင်းတွေကို ကိုင်တွယ်ချင်နေတာကြောင့် ဆော်ဒီကလပ် အယ်လ်အစ်တီဟတ်အသင်းရဲ့ကြီးမားတဲ့ ကမ်းလှမ်းမှုကိုတောင် ပယ်ချခဲ့တာပါ။ဗြိတိန်မီဒီယာတွေကတော့ ဒီသတင်းတွေကို ဖော်ပြထားခြင်းမရှိပေမယ့် စပိန်လူမျိုးနည်းပြက သူ့ကို ယူနိုက်တက်အသင်းက ကမ်းလှမ်းခဲ့မယ်ဆိုရင် လက်ခံဖို့ ရှိနေတာဖြစ်ပါတယ်။
နောက်ဆုံး ၂ ပွဲဆက်အရေးနိမ့်ထားတဲ့ ယူနိုက်တက်အသင်းဟာ ဒီတစ်ပတ်မှာ လီဗာပူးလ်အသင်းနဲ့ ပရီးမီးယားလိဂ်ယှဉ်ပြိုင်ရမှာဖြစ်ပြီး ထပ်မံအရေးနိမ့်ခဲ့မယ်ဆိုရင် အဲရစ်တန်ဟတ်ရဲ့အနာဂတ်ဟာ ပိုပြီးလှုပ်ခတ်လာတော့မှာဖြစ်ပါတယ်။