ယူနိုက်တက်အသင်းနည်းပြ အဲရစ်တန်ဟတ်ဟာ အက်စတွန်ဗီလာအသင်းကို ၂ ဂိုး-၁ ဂိုးနဲ့ အနိုင်ရတဲ့ပွဲမှာ အသင်းအတွက် အဖိုးတန်အနိုင်ဂိုးသွင်းယူပေးခဲ့တဲ့ ကွင်းလယ်လူ တော်မီနေးကို ချီးကျူးမှုပြုလုပ်သွားခဲ့ပါတယ်။
တော်မီနေးဟာ ဗီလာနဲ့ ယူနိုက်တက်အသင်းတို့ ၁ ဂိုးစီသရေကျနေတဲ့အချိန် ပွဲချိန် ၇၂ မိနစ်မှာ လူစားလဲဝင်ရောက်လာခဲ့ပြီး ပွဲချိန် ၈၆ မိနစ်မှာ ဒါလော့ရဲ့ဖြတ်တင်ဘောကို ခေါင်းတိုက်ပြီးအဆုံးသတ်ပေးခဲ့တာပါ။ဒီနိုင်ပွဲကြောင့် ယူနိုက်တက်အသင်းဟာ ချန်ပီယံလိဂ်ဝင်ခွင့်ရဖို့ မျှော်လင့်ချက်တွေ ပိုပြီးရှင်သန်လာခဲ့တာဖြစ်ပါတယ်။
တော်မီနေးဟာ ဒီရာသီမှာ ယူနိုက်တက်အသင်းအတွက် လူစားဝင်ကစားသမားအဖြစ်သာ ပါဝင်နေရပေမယ့် ပရီးမီးယားလိဂ်ပြိုင်ပွဲမှာ ၇ ဂိုးသွင်းယူထားပြီး ယူနိုက်တက်အသင်းရဲ့ဂိုးသွင်းအများဆုံးကစားသမားအဖြစ် ဦးဆောင်နေတာပါ။အဲ့ဒါကြောင့် အဲရစ်တန်ဟတ်က တော်မီနေးကို ဗီလာအသင်းနဲ့ပွဲအပြီးမှာ ချီးကျူးမှုပြုလုပ်ခဲ့တာဖြစ်ပါတယ်။
အဲရစ်တန်ဟတ်က “အရန်ခုံကနေ ဝင်လာပြီးအသင်းအတွက် အကျိုးပြုနိုင်တဲ့ ကစားသမားအများအပြားမရှိပါဘူး။ တော်မီနေးဟာ အခြားကစားသမားတွေအတွက် စံနမူနာဖြစ်ပြီး အမြဲတမ်းမှန်ကန်တဲ့အရာတွေကိုလုပ်ပါတယ်။သူဟာ ၁ မိနစ်ပဲဖြစ်ဖြစ် မိနစ် ၉၀ ပဲဖြစ်ဖြစ် အမြဲတမ်းအဆင်သင့်ဖြစ်နေပါတယ်။ဒီလိုကစားသမားမျိုးရှိတာ အလွန်ကောင်းပါတယ်”လို့ ဆိုခဲ့ပါတယ်။
ယူနိုက်တက်အသင်းဟာ ဒီနိုင်ပွဲကြောင့် ပရီးမီးယားလိဂ်အဆင့် ၄ နေရာမှာရှိနေတဲ့ စပါးအသင်းနဲ့ ၆ မှတ်အကွာ အဆင့် ၆ နေရာမှာ ရပ်တည်နေတာဖြစ်ပါတယ်။
