အာဆင်နယ်အသင်းဟာ လီဗာပူးလ်အသင်းကို ၂ ဂိုး- ဂိုးမရှိနဲ့ အရေးနိမ့်ပြီး FA ဖလားကနေ ထွက်ခွာခဲ့ရပြီးနောက် အသင်းအနေနဲ့ အနားယူဖို့လိုအပ်ပြီလို့ နည်းပြ အာတီတာက ပြောခဲ့ပါတယ်။
အာဆင်နယ်အသင်းဟာ ဒီပွဲမှာ ဂိုးရနိုင်မယ့် အခွင့်အရေးတွေကို အသုံးမချနိုင်ခဲ့တာကြောင့် နောက်ဆုံး ၃ ပွဲဆက်ရှုံးနိမ့်မှုနဲ့အတူ နောက်ဆုံးကစားခဲ့တဲ့ ပြိုင်ပွဲစုံ ၇ ပွဲမှာ ၁ ပွဲသာအနိုင်ရရှိခဲ့တာပါ။အာဆင်နယ်အသင်းဟာ နောက်ဆုံး ၃ ပွဲမှာ ဂိုးပေါက်ကန်သွင်းမှု ၆၃ ကြိမ်အထိပြုလုပ်ခဲ့ပေမယ့် ၁ ဂိုးသာ သွင်းယူနိုင်ခဲ့တာဖြစ်ပါတယ်။
အာတီတာက”ကျနော်တို့ဟာ စိတ်ပိုင်းဆိုင်ရာ ပြဿနာဖြစ်လာတာဖြစ်နိုင်ပါတယ်။အဲ့ဒါကြောင့် ကျနော်တို့ အနားယူဖို့လိုအပ်ပါတယ်။အနားယူရတာက ကောင်းပြီး ကျနော်တို့အတွက် အချိန်ကောင်းတစ်ခုရောက်ရှိလာမှာပါ။အခြေအနေကောင်းလာတဲ့အချိန်မှာ ရထားပေါ်ပြန်တက်မှာဖြစ်ပေမယ့် အခုအချိန်မှာတော့ ခက်ခဲနေပြီ”လို့ ဆိုခဲ့ပါတယ်။
အာဆင်နယ်အသင်းဟာ ဇန်နဝါရီ ၂၀ ရက်မှ ပရီးမီးယားလိဂ်ပွဲစဉ်ပြန်ကစားရမှာဖြစ်ပြီး အနားရထားတဲ့အချိန်မှာ ဒူဘိုင်းသွားပြီး စခန်းသွင်းလေ့ကျင့်မှုပြုလုပ်ဖို့ စီစဉ်နေတာဖြစ်ပါတယ်။အာဆင်နယ်အသင်းဟာ တိုက်စစ်ပိုင်းက ဂိုးရဖို့ ရုန်းကန်နေရပေမယ့် နည်းပြ အာတီတာက ဒီအပြောင်းအရွှေ့မှာ တိုက်စစ်မှူးခေါ်ယူဖို့ မဖြစ်နိုင်ဘူးလို့ ပြောခဲ့ပါတယ်။
