လက်ထပ်လက်စွပ်ပြန်ရှာတွေ့ခဲ့လို့ အပျော်ကြီးပျော်နေခဲ့တဲ့ ကလောပ့်

လီဗာပူးလ်အသင်းက နယူးကာဆယ်အသင်းကို အနိုင်ရတဲ့ပွဲစဉ်အပြီးမှာ နည်းပြ ကလောပ့်ဟာ သူ့ရဲ့လက်ထပ်လက်စွပ်ပျောက်သွားခဲ့လို့ စိတ်ပျက်စရာတွေနဲ့ ခဏတာကြုံတွေ့ခဲ့ရတာဖြစ်ပါတယ်။

ဒါပေမယ့် ကင်မရာမန်းတစ်ဦးက ဒီလက်ထပ်လက်စွပ်ကို ကွင်းအတွင်းမှာ ရှာဖွေတွေ့ရှိခဲ့အပြီးမှာ ကလောပ့်ဟာ စိတ်သက်သာရာရရှိခဲ့ပြီး ကင်မရာရှေ့မှာ လက်စွပ်ကို နမ်းကာ ပျော်ရွှင်နေခဲ့တာဖြစ်ပါတယ်။လီဗာပူးလ်အသင်းကတော့ ဒီနိုင်ပွဲကြောင့် အဆင့် ၂ နေရာက ဗီလာအသင်းကို ၃ မှတ်အသာနဲ့ ပရီးမီးယားလိဂ်အမှတ်ပေးဇယားကို ဦးဆောင်နေတာပါ။

ကလောပ့်က “ကျနော်အကြီးအကျယ်ထိတ်လန့်သွားခဲ့ရပါတယ်။ဒါပေမယ့် ပြန်တွေ့ခဲ့ပါပြီ။ဒီလက်စွပ်သာ ပျောက်သွားရင် တကယ်ကိုဆိုးရွားသွားပါလိမ့်မယ်။ကျနော်တစ်ခါပျောက်ခဲ့ဖူးပြီး ပင်လယ်ထဲမှာ ပျောက်ခဲ့လို့ဒါကိုပြန်ရှာဖို့ဆိုရင် ပရော်ဖက်ရှင်နယ်ဒိုင်ဗင်သမားတစ်ဦးတော့လိုပါလိမ့်မယ်”လို့ ဆိုခဲ့ပါတယ်။

လီဗာပူးလ်အသင်းဟာ ဒီရာသီမှာ ပုံစံကောင်းတွေရရှိနေပြီး ပရီးမီးယားလိဂ်ချန်ပီယံဆုကို ရယူနိုင်ဖို့ ပစ်မှတ်ထားနေခဲ့တာပါ။လီဗာပူးလ်အသင်းဟာ ဒီတစ်ပတ်မှာတော့ FA ဖလားပွဲစဉ်အဖြစ် အာဆင်နယ်အသင်းနဲ့ ယှဉ်ပြိုင်ရမှာဖြစ်ပါတယ်။