လီဗာပူးလ်အသင်းဟာ ဒီမနက်ကစားခဲ့တဲ့ ပရီးမီးယားလိဂ်ပွဲစဉ်မှာ နယူးကာဆယ်အသင်းကို ၄ ဂိုး-၂ ဂိုးနဲ့ အနိုင်ရပြီး ပရီးမီးယားလိဂ်အမှတ်ပေးဇယားကို ၃ မှတ်အသာနဲ့ ဦးဆောင်နိုင်ခဲ့ပြီဖြစ်ပါတယ်။
ဆာလတ်ဟာ ဒီပွဲမှာ ပင်နယ်တီလွဲခဲ့ပေမယ့် လီဗာပူးလ်အသင်းအတွက် ၂ ဂိုးသွင်းယူနိုင်ခဲ့သလို ကာတစ်ဂျုံးစ်နဲ့ ဂတ်ပိုတို့က ၁ ဂိုးစီသွင်းယူခဲ့တာပါ။နယူးကာဆယ်အသင်းအတွက်ဂိုးတွေကို အိုင်ဆက်နဲ့ ဘော့ဒ်မန်းတို့က သွင်းယူခဲ့တာဖြစ်ပါတယ်။လီဗာပူးလ်အသင်းဟာ ဒီနိုင်ပွဲကြောင့် ဒုတိယနေရာက ဗီလာအသင်းကို ၃ မှတ်အသာနဲ့ ပရီးမီးယားလိဂ်အမှတ်ပေးဇယားကို ဦးဆောင်နိုင်ခဲ့တာပါ။
လီဗာပူးလ်အသင်းဟာ ဒီပွဲမှာ ဂိုးပေါက်ကန်သွင်းမှု ၃၄ ကြိမ်အထိပြုလုပ်နိုင်ခဲ့တာဖြစ်ပြီး ဂိုးပေါက်ထည့်မှု ၁၅ကြိမ်အထိရှိခဲ့တာဖြစ်ပါတယ်။လီဗာပူးလ်အသင်းဟာ ဒီရာသီ ပရီးမီးယားလိဂ်ဖလားကို ရယူနိုင်ဖို့အတွက် အမှားအယွင်းမခံဘဲ ပုံစံကောင်းတွေကို ဆက်ပြီးပြသနေတာပါ။
လီဗာပူးလ်အသင်းဟာ ဒီတစ်ပတ်မှာတော့ FA ဖလားပွဲစဉ်အဖြစ် အာဆင်နယ်အသင်းနဲ့ ယှဉ်ပြိုင်ရမှာဖြစ်ပါတယ်။