တွစ်တာပေါ်မှာ ဖော်လိုဝါအများဆုံးအားကစားသမားတွေထဲက တစ်ဦးဖြစ်တဲ့ ရော်နယ်ဒိုဟာ တွစ်တာရဲ့ပြောင်းလဲလိုက်တဲ့ မူဝါဒတွေကြောင့် အပြာရောင်အမှတ်အသားကို ဆုံးရှုံးသွားခဲ့ပြီဖြစ်ပါတယ်။
ရော်နယ်ဒိုဟာ တွစ်တာပေါ်မှာ ဖော်လိုဝါ ၁၀၈.၃ သန်းရှိပြီး အရင်က တရားဝင်အကောင့်ဖြစ်တယ်ဆိုတာကို အသိအမှတ်ပြုဖို့အတွက် ဒီအပြာရောင်အမှတ်အသားတွေထားရှိခဲ့ကြတာပါ။ဒါပေမယ့် တွစ်တာက စည်းမျဉ်းအသစ် ချမှတ်ခဲ့တာကြောင့် နာမည်ကြီးအများအပြားရဲ့အကောင့်တွေဟာ အပြာရောင်အမှတ်အသားဆုံးရှုံးခဲ့ရပါတယ်။
ဒီထဲမှာ ရော်နယ်ဒိုလည်း တစ်ဦးအပါအဝင်ဖြစ်ခဲ့ပါတယ်။အခုဆိုရင် တွစ်တာအသုံးပြုသူတွေအနေနဲ့ ဒီအပြာရောင်အမှတ်အသားကို ရချင်ရင် တစ်လကို ၈ ဒေါ်လာပေးရတော့မှာပါ။အီလွန်မတ်စ်ဟာ တွစ်တာကို ၂၀၂၂ အောက်တိုဘာလက ဒေါ်လာ ၄၄ ဘီလီယံနဲ့ ဝယ်ယူခဲ့တာဖြစ်ပြီး သူ့ရဲ့ငွေရှာနည်းကို သဘောကျနေပါတယ်။
လီဘရွန်ဂျိမ်းစ်အပါအဝင် နာမည်ကျော်အများအပြားလည်း ဒီအပြာရောင်အမှတ်အသားကို ဆုံးရှုံးခဲ့ရပါတယ်။ရော်နယ်ဒိုတို့လို တစ်ပတ်ကို ပေါင်သန်းချီဝင်နေတဲ့ ကစားသမားတွေအတွက် ၈ ဒေါ်လာဟာ စာဖွဲ့စရာမရှိပေမယ့် တွစ်တာကို ပေးချေမလားဆိုတာတော့ စောင့်ကြည့်ရမှာဖြစ်ပါတယ်။