မက်ဆီဟာ ဆော်ဒီကလပ် အယ်လ်ဟီလယ်အသင်းနဲ့ ပေါင် ၅၂၂ သန်းတန်ကြေးရှိ စာချုပ်မှာလတ်မှတ်ထိုးပြီး အခုရာသီအကုန်မှာ ပြောင်းတော့မယ်ဆိုပြီး ထွက်ပေါ်လာတဲ့ သတင်းတွေကို ဖခင်ဖြစ်သူ ဂျော့ချ်မက်ဆီက ငြင်းဆန်လိုက်ပါတယ်။
မက်ဆီနဲ့ ပီအက်စ်ဂျီတို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာဖြစ်ပြီး မကြာသေးခင်က ဆော်ဒီခရီးစဉ်ကြောင့် အရေးယူမှုတွေခံရပြီးနောက် အာဂျင်တီးနားကစားသမားဟာ အသင်းကနေ ထွက်ခွာတော့မယ်လို့ သတင်းတွေထွက်ပေါ်နေတာဖြစ်ပါတယ်။
မက်ဆီဟာ ဆော်ဒီကလပ် အယ်လ်ဟီလယ်ထံပြောင်းတော့မယ့် သတင်းတွေဟာ ကျယ်ကျယ်ပြန့်ပြန့်ထွက်ပေါ်နေတာကြောင့် ဖခင်ဖြစ်သူက အလျင်အမြန်ကြေညာချက်ထုတ်ကာ ဖြေရှင်းခဲ့ရတာပါ။
ဂျော့ချ်မက်ဆီက “မက်ဆီဟာ လာမယ့်ရာသီအတွက် ဘယ်အသင်းနဲ့မှ သဘောတူညီမှုမရသေးပါဘူး။သူဟာ ပီအက်စ်ဂျီအသင်းနဲ့ လိဂ်ပွဲမပြီးဆုံးမချင်း ဆုံးဖြတ်ချက်ကို ချဦးမှာမဟုတ်ပါဘူး။ရာသီကုန်မှသာ ခွဲခြမ်းစိတ်ဖြာပြီး ဆုံးဖြတ်ချက်ချမှာပါ။ကောလဟာတွေကရှိတက်ပြီး အတော်များများက လီယွန်နယ်ကို နာမည်ဆိုးအတွက် အသုံးပြုကြပါတယ်”
“အမှန်တရားကတော့ ဘယ်အသင်းနဲ့မှ သဘောတူညီမှုမရဘူးဆိုတာကို အာမခံပါတယ်။နှုတ်နဲ့ပဲဖြစ်ဖြစ်၊ လတ်မှတ်ထိုးခြင်းလည်းမရှိ၊သဘောတူညီမှုလည်းမရှိပါဘူး။ဒါဟာ ရာသီအကုန်ထိ ရှိမှာမဟုတ်ပါဘူး”လို့ ပြောခဲ့ပါတယ်။