အေစီမီလန်အသင်းနည်းပြ ပိုင်အိုလီက ချန်ပီယံလိဂ်ဆီမီးဖိုင်နယ်ပထမအကျော့ပွဲစဉ်မှာ မြို့ခံပြိုင်ဘက် အင်တာမီလန်အသင်းကို ၂ ဂိုး- ဂိုးမရှိနဲ့အရေးနိမ့်ခဲ့ပေမယ့် သူတို့ ဗိုလ်လုပွဲတက်နိုင်မယ်လို့ ယုံကြည်နေတာ ဖြစ်ပါတယ်။
ချန်ပီယံလိဂ်ဆီမီးဖိုင်နယ်ဒုတိယအကျော့ပွဲစဉ်ကိုလည်း ဆန်စီရိုမှာပဲ ကစားရမှာဖြစ်ပြီး ဒီပွဲကိုတော့ အင်တာမီလန်က အိမ်ရှင်အဖြစ် ကျင်းပရမှာပါ။အင်တာမီလန်အသင်းဟာ ပထမအကျော့မှာ ၂ ဂိုးအသာရထားတာကြောင့် ချန်ပီယံလိဂ်ဗိုလ်လုပွဲတက်နိုင်ဖို့ ပိုပြီးရေပန်းစားနေတာ ဖြစ်ပါတယ်။
ဒါပေမယ့် အေစီမီလန်အသင်းကတော့ သူတို့ဟာ ဘယ်သူမှမထင်မှတ်ထားတဲ့ ဆီမီးဖိုင်နယ်ကို တက်ခဲ့သလို ချန်ပီယံလိဂ်ဗိုလ်လုပွဲလည်း တက်နိုင်မယ်လို့ နည်းပြ ပိုင်အိုလီက ယုံကြည်နေတာပါ။
ပိုင်အိုလီက “အားနည်းချက်နဲ့ စတင်ရမယ်ဆိုတာကို သိပေမယ့် ဒါကို ပြန်ပြောင်းနိုင်အောင် လုပ်ရမယ့် အရည်အသွေးတွေ ကျွန်တော်တို့ဆီမှာ ရှိပါတယ်။အခုအချိန်မှာ ကျွန်တော်တို့ ဗိုလ်လုပွဲတက်နိုင်မယ်လို့ ဘယ်သူကမှ ထင်မှာမဟုတ်ပါဘူး”
“ကျွန်တော်တို့ဟာ ပွဲကြီးပွဲကောင်းတွေ ကစားခဲ့ရပြီး ကစားသမားတွေ ဘယ်လောက်သန်မာလဲ ဆိုတာကို သိပါတယ်။ကျွန်တော်တို့စိတ်ထဲမှာ အရေးအကြီးဆုံးအရာက ချန်ပီယံလိဂ်ဗိုလ်လုပွဲတက်ဖို့ပါ”လို့ဆိုခဲ့တာဖြစ်ပါတယ်။
