ဘိုင်ယန်မြူးနစ်အသင်းနည်းပြ တူချယ်လ်က ဒီနေ့ကစားမယ့် လေဗာကူဆင်အသင်းနဲ့ ဘွန်ဒစ်လီဂါပွဲစဉ်မှာ လေဗာကူဆင်အသင်းရဲ့ရှုံးပွဲမရှိစံချိန်ကို ချိုးဖျက်ဖို့ ယုံကြည်မှုအပြည့်ရှိတယ်လို့ ပြောလိုက်ပါတယ်။
လေဗာကူဆင်အသင်းဟာ လက်ရှိအချိန်မှာ ပြိုင်ပွဲစုံ ၃၀ ပွဲဆက်တိုက်ရှုံးပွဲမရှိဘဲ အကောင်းဆုံးပုံစံရရှိနေပြီး ဒီရာသီဘွန်ဒစ်လီဂါအမှတ်ပေးဇယားမှာ ဘိုင်ယန်မြူးနစ်အသင်းကို ၂ မှတ်အသာရကာ အမှတ်ပေးဇယားကို ဦးဆောင်နေတာပါ။တူချယ်လ်ကတော့ ကြားနေပရိသတ်တွေဟာ ဘိုင်ယန်မြူးနစ်အသင်း ဘွန်ဒစ်လီဂါမှာ ကြီးစိုးနေတာကို အဆုံးသတ်ဖို့ လိုလားပြီး လေဗာကူဆင်အသင်းကို ဆုဖလားရရှိစေချင်နေတယ်လို့ ပြောခဲ့ပါတယ်။
တူချယ်လ်က”အသင်း ၃၀ က သူတို့ကို အနိုင်ယူဖို့ ကြိုးစားခဲ့ပေမယ့် ဘယ်သူမှမလုပ်နိုင်ခဲ့ပါဘူး။ဒီပွဲက ထူးခြားတဲ့ပွဲဖြစ်ပြီး ကျနော်တို့ ရမှတ် ၂ မှတ်ပဲလျော့နည်းတာပါ။ဒီပွဲဟာ ကျနော်တို့အတွက် ကောင်းမွန်တဲ့ အခွင့်အရေးဖြစ်ပြီး ကျနော်တို့အနိုင်ရဖို့ သွားနေတာဖြစ်ပါတယ်။ကျနော်တို့ဟာ လေဗာကူဆင်ကို ဆုဖလားရရှိစေချင်နေတဲ့ ကြားနေပရိသတ်အများအပြားနဲ့ ယှဉ်ပြိုင်နေရတာပါ။ကျနော်တို့ဟာ ဒီပွဲမှာ အကောင်းဆုံးလုပ်ပြသွားမှာပါ”လို့ ဆိုခဲ့ပါတယ်။
ဒီပွဲမှာသာ လေဗာကူဆင်အသင်းအနိုင်ရခဲ့ရင် သူတို့ရဲ့ရှုံးပွဲမရှိစံချိန်ကို ဆက်ပြီးတိုးနိုင်မှာဖြစ်သလို ဘိုင်ယန်မြူးနစ်ကို ၅ မှတ်အသာရသွားမှာဖြစ်ပါတယ်။ဘိုင်ယန်မြူးနစ်အသင်းက အနိုင်ရသွားခဲ့ရင် လေဗာကူဆင်အသင်းရဲ့ရှုံးပွဲမရှိစံချိန်ကို ချိုးဖျက်ပြီး အမှတ်ပေးဇယားထိပ်ဆုံးနေရာကို ပြန်ရောက်ရှိမှာဖြစ်ပါတယ်။