EA Sports ကတော့ ကမ္ဘာ့ဖလားပြိုင်ပွဲကို ဘယ်အသင်းရယူနိုင်မလဲဆိုတာကို လူတွေတွေးနေချိန်မှာ ဒီပြိုင်ပွဲရဲ့ ချန်ပီယံဆုကို ခန့်မှန်းသွားခဲ့တာဖြစ်ပါတယ်။EA Sports က အာဂျင်တီးနားဟာ ဒီပြိုင်ပွဲမှာ ချန်ပီယံဆုကို ရရှိမယ်လို့ ခန့်မှန်းခဲ့တာပါ။
EA Sports ဟာ ကမ္ဘာ့ဖလားပြိုင်ပွဲတစ်ခုလုံးအတွက် ခန့်မှန်းမှုပြုလုပ်သွားခဲ့တာဖြစ်ပါတယ်။သူတို့ ဟာ ကမ္ဘာ့ဖလားချန်ပီယံဆုကို ခန့်မှန်းတာနဲ့ ပက်သက်ပြီး အထင်ကြီးစရာကောင်းတဲ့ မှတ်တမ်းတွေလည်း ရှိခဲ့တာပါ။
EA Sports က ပြီးခဲ့တဲ့၂၀၁၀ ကမ္ဘာ့ဖလားမှာ စပိန်၊ ၂၀၁၄ ကမ္ဘာ့ဖလားမှာ ဂျာမနီနဲ့ ၂၀၁၈ ကမ္ဘာ့ဖလားပြိုင်ပွဲမှာ ပြင်သစ်အသင်းချန်ပီယံဆုရယူနိုင်မယ်လို့ ခန့်မှန်းခဲ့ရာမှာ တိကျမှန်ကန်ခဲ့တာဖြစ်ပါတယ်။EA Sports က အာဂျင်တီးနားအသင်းဟာ ကမ္ဘာ့ဖလားဗိုလ်လုပွဲမှာ တောင်အမေရိကတိုက်တစ်တိုက်ထဲက ဘရာဇီးလ်နဲ့ တွေ့ဆုံမယ်လို့ ခန့်မှန်းခဲ့တာပါ။
ဒီပွဲမှာ အာဂျင်တီးနားက ၁ ဂိုး- ဂိုးမရှိနဲ့ အနိုင်ရကာ ချန်ပီယံဆုကို ရယူမယ်လို့ ခန့်မှန်းခဲ့တာဖြစ်ပါတယ်။ တတိယနေရာကိုတော့ ပြင်သစ်နဲ့ ပေါ်တူဂီတို့ ယှဉ်ပြိုင်ရမှာဖြစ်ပြီး ပြင်သစ်က ၄ ဂိုး- ၂ ဂိုးနဲ့ အနိုင်ရမယ်လို့ EA Sports က ခန့်မှန်းခဲ့တာပါ။
နာမည်ကြီး အင်္ဂလန်ကတော့ ၁၆ သင်းအဆင့်မှာ နယ်သာလန်ကို အရေးနိမ့်ပြီး ထွက်ခွာရမယ်လို့ လည်း ခန့်မှန်းချက်မှာ ဖော်ပြထားတာဖြစ်ပါတယ်။
မက်ဆီဟာ ဒီပြိုင်ပွဲမှာ ၇ ပွဲကစားပြီး ၈ ဂိုးသွင်းယူကာ ဂိုးသွင်းဘုရင်ဆုနဲ့ ပြိုင်ပွဲရဲ့ အကောင်းဆုံးကစားသမားဆု ကို ရရှိမယ်လို့လည်း EA Sports က ခန့်မှန်းချက်အရ သိရပါတယ်။