ဘာစီလိုနာအသင်းရဲ့ကြယ်ပွင့်ကစားသမား အန်ဆုဖာတီဟာ ဘရိုက်တန်အသင်းထံ အခုနှစ်ရာသီအကုန်ထိအငှားနဲ့ ပြောင်းရွှေ့ဖို့ သဘောတူညီမှုရရှိခဲ့တယ်လို့ ဖာဘရီဇီယိုရိုမန်နိုက ဖော်ပြထားပါတယ်။
အစောပိုင်းက အန်ဆုဖာတီကို ခေါ်ယူဖို့ စပါးနဲ့ ချယ်လ်ဆီးအသင်းတို့ စိတ်ဝင်စားနေတယ်လို့ သတင်းတွေထွက်ခဲ့ပေမယ့် ကစားသမားက ဘရိုက်တန်အသင်းထံ ပြောင်းရွှေ့ဖို့ ရွေးချယ်ခဲ့တာပါ။စပိန်ကြယ်ပွင့်ကစားသမားဟာ နည်းပြဒီဇာဘီရဲ့ကစားဟန်ကို သဘောကျတာကြောင့် ဘရိုက်တန်အသင်းကို ရွေးချယ်ခဲ့တာလို့ သိရပါတယ်။
ဘရိုက်တန်အသင်းဟာ အန်ဆုဖာတီကို ရာသီအကုန်ထိသာ အငှားနဲ့ ခေါ်ယူမှာဖြစ်ပြီး အပြီးသတ်ဝယ်ယူခွင့်မပါဝင်တာကြောင့် ကစားသမားဟာ စာချုပ်ကုန်ဆုံးချိန်မှာ ဘာစီလိုနာအသင်းထံ ပြန်လာရမှာဖြစ်ပါတယ်။ဘရိုက်တန်အသင်းဟာ အငှားစာချုပ်အတွက် အန်ဆုဖာတီရဲ့လုပ်ခလစာအများအပြားကို ပေးရမှာဖြစ်တယ်လို့ သိရပါတယ်။
အန်ဆုဖာတီဟာ ဘာစီလိုနာနည်းပြ ဇာဗီရဲ့လက်အောက်မှာ ပုံမှန်ကစားခွင့်ရဖို့ ခက်ခဲနေတာကြောင့် ပုံမှန်ကစားခွင့်ရနိုင်မယ့် အသင်းထံ အငှားနဲ့ပြောင်းရွှေ့ပြီး သူ့ရဲ့ခြေစွမ်းတွေကို သက်သေပြချင်နေတာပါ။အန်ဆုဖာတီဟာ ဘရိုက်တန်အသင်းနဲ့ အပြောင်းအရွှေ့အပြီးသတ်ဖို့ ဒီနေ့မှာ အင်္ဂလန်ကို လာရောက်မယ်လို့ သိရပါတယ်။
