အိုဒီဂတ်လက်ထိဘောမှာ လီဗာပူးလ်ပင်နယ်တီရသင့်တယ်လို့ဝန်ခံခဲ့တဲ့ ဆာလီဘာ

လီဗာပူးလ်နဲ့ အာဆင်နယ်အသင်းတို့ ၁ ဂိုးစီသရေကျခဲ့တဲ့ ပရီးမီးယားလိဂ်ပွဲစဉ်ရဲ့ပထမပိုင်းမှာ အာဆင်နယ်အသင်းခေါင်းဆောင် အိုဒီဂတ် ဂိုးဧရိယာအတွင်း လက်နဲ့ထိခဲ့တဲ့ အဖြစ်အပျက်မှာ လီဗာပူးလ်အသင်း ပင်နယ်တီရသင့်တယ်လို့ အာဆင်နယ်အသင်းနောက်ခံလူ ဆာလီဘာက ပြောခဲ့ပါတယ်။

အာဆင်နယ်အသင်းက ၁ ဂိုး ဂိုးမရှိနဲ့ ဦးဆောင်နေတဲ့ ဒီအချိန်မှာ အိုဒီဂတ်ဟာ ဆာလာရဲ့ဘောလုံးလမ်းကြောင်းကို ဂိုးဧရိယာအတွင်း လက်နဲ့ တားဆီးသလိုဖြစ်ခဲ့တာပါ။ဒီအဖြစ်အပျက်နဲ့ ပတ်သက်ပြီး VAR တာဝန်ရှိသူက ကွင်းလယ်ဒိုင်လူကြီးကို ကွင်းအတွင်းရှိ မော်နီတာမှာ သွားရောက်စစ်ဆေးဖို့ ညွှန်ကြားခဲ့ခြင်းမရှိတာဖြစ်ပါတယ်။

အဲ့ဒါကြောင့် ကွင်းလယ်ဒိုင်လူကြီးဟာ ပွဲကိုဆက်ကစားစေခဲ့တဲ့အတွက် လီဗာပူးလ်အသင်း ဂိုးရနိုင်မယ့် အခွင့်အရေးနစ်နာခဲ့ရတာပါ။ဒီအဖြစ်အပျက်ကို အနီးကပ်မြင်တွေ့ခဲ့ရတဲ့ ဆာလီဘာက ဒါကို ပင်နယ်တီပေးသင့်တယ်လို့ ပြောခဲ့တာဖြစ်ပါတယ်။

ဆာလီဘာက “ဒါကို ပင်နယ်တီပေးရမှာပါ။ပင်နယ်တီလို့ပြောပေမယ့် ကျနော်က ကွင်းလယ်ဒိုင်လူကြီးမဟုတ်တဲ့အတွက် သူတို့ဒါကို လက်ခံရမှာပါ”လို့ ဆိုခဲ့ပါတယ်။

လီဗာပူးလ်အသင်းနည်းပြ ကလောပ့်ကလည်း ဒီအဖြစ်အပျက်မှာ ပင်နယ်တီပေးဖို့ မပြောခဲ့တဲ့ VAR ဒိုင်လူကြီးကို ဝေဖန်မှုပြုလုပ်ခဲ့တာဖြစ်ပါတယ်။ဒီပွဲမှာ သရေကျခဲ့တာကြောင့် အာဆင်နယ်အသင်းဟာ ခရစ္စမတ်နေ့မှာ ပရီးမီးယားလိဂ်အမှတ်ပေးဇယားကို ဦးဆောင်နိုင်ခဲ့ပါတယ်။