ဒီရာသီပရီးမီးယားလိဂ်ပြိုင်ပွဲမှာ ရလဒ်ကောင်းတွေဆက်တိုက်ရရှိနေတဲ့ အက်စတွန်ဗီလာအသင်းဟာ ဒီမနက်ကစားခဲ့တဲ့ ပရီးမီးယားလိဂ်ပွဲစဉ်မှာ ရှက်ဖီးယူနိုက်တက်အသင်းနဲ့ ၁ ဂိုးစီသရေကျသွားခဲ့တာဖြစ်ပါတယ်။
ဗီလာအသင်းဟာ ဒီပွဲမှာ အနိုင်မရရှိခဲ့တာကြောင့် ပရီးမီးယားလိဂ်ထိပ်ဆုံးနေရာတက်လှမ်းနိုင်မယ့် မျှော်လင့်ချက်ကို လက်လွှတ်ခဲ့ရသလို အခုနှစ် ဖေဖော်ဝါရီလကတည်းက ဗီလာပါ့ခ်မှာ တင်ထားခဲ့တဲ့ စံချိန်ကောင်းတစ်ခုလည်း ရပ်တန့်သွားခဲ့ရတာဖြစ်ပါတယ်။ဗီလာအသင်းဟာ ရှက်ဖီးယူနိုက်တက်အသင်းနဲ့မတိုင်ခင် နောက်ဆုံးကစားခဲ့တဲ့ အိမ်ကွင်းပွဲတွေမှာ မန်စီးတီးနဲ့ အာဆင်နယ်ကို အနိုင်ယူထားတာပါ။
ဒါပေမယ့် အက်စတွန်ဗီလာအသင်းရဲ့အိမ်ကွင်း ၁၅ ပွဲဆက်တိုက်အနိုင်ရတဲ့စံချိန်ဟာ အဆင့် ၁၉ နေရာက ရှက်ဖီးယူနိုက်တက်အသင်းနဲ့အတွေ့မှာ ရပ်တန့်သွားခဲ့တာဖြစ်ပါတယ်။ဗီလာအတွက်တော့ ဒီလိုစံချိန်မှတ်တမ်းကောင်းတစ်ခုရပ်တန့်ခံလိုက်ရတာဟာ သူတို့အတွက် စိတ်ပျက်စရာဖြစ်မှာ အသေအချာပါပဲ။
ဗီလာအသင်းဟာ ဒီပွဲသရေကျခဲ့တာကြောင့် ပရီးမီးယားလိဂ်အဆင့် ၂ နေရာကို တက်လှမ်းနိုင်ခဲ့ပြီး ကြားရက်ထဲမှာ ယူနိုက်တက်အသင်းနဲ့ ယှဉ်ပြိုင်ရမှာဖြစ်ပါတယ်။