မန်စီးတီးအသင်းနည်းပြ ဂွာဒီယိုလာက နယူးကာဆယ်အသင်းကို ၃ ဂိုး-၂ ဂိုးနဲ့ အနိုင်ရတဲ့ပွဲမှာ မန်စီးတီးအသင်းအတွက် လူစားဝင်ပြီး ဂိုးသွင်းဂိုးဖန်တီးနိုင်ခဲ့တဲ့ ဒီဘရိုင်းကို ဂန္ထဝင်အဖြစ် တင်စားခေါ်ဝေါ်သွားခဲ့ပါတယ်။
ဒီဘရိုင်းဟာ ဒီပွဲစဉ်ရဲ့ပွဲချိန် ၆၉ မိနစ်မှာ မန်စီးတီးအသင်းအတွက် လူစားဝင်လာခဲ့ပြီး အဖိုးတန်ချေပဂိုးနဲ့ အောစကာဘော့အနိုင်ဂိုးသွင်းယူနိုင်အောင်ဖန်တီးနိုင်ခဲ့တာပါ။ဒီပွဲဟာ ဒီဘရိုင်းအတွက် တံကောက်ကြောဒဏ်ရာကြောင့် ၅ လကြာအနားယူရပြီးနောက် ပထမဆုံးပြန်ကစားနိုင်ခဲ့တဲ့ ပရီးမီးယားလိဂ်ပွဲစဉ်ဖြစ်ခဲ့ပါတယ်။
ဂွာဒီယိုလာက “သူဟာ ဂန္ထဝင်တစ်ဦးပါ။သူဟာ မိနစ် ၉၀ ပါဝင်ကစားဖို့အဆင်သင့်မဖြစ်ပေမယ့် နောက်ဆုံးမိနစ်တွေမှာ သက်ရောက်မှုရှိခဲ့ပါတယ်။သွင်းဂိုးနဲ့ ဂိုးဖန်တီးမှုတွေကြောင့် လူတွေက သူ့ကို နှစ်သက်ကြပြီး သူဟာ ကျနော်တို့ကို အဆုံးထိကူညီပေးနိုင်မယ်လို့ မျှော်လင့်ကြောင်း”ဆိုခဲ့ပါတယ်။
ဒီဘရိုင်းဟာ ပြီးခဲ့တဲ့ FA ဖလားပွဲစဉ်ဖြစ်တဲ့ ဟက်ဒါဖီးစ်အသင်းနဲ့ပွဲစဉ်မှာလည်း မန်စီးတီးအသင်းအတွက် လူစားဝင်ကစားသမားအဖြစ် ပါဝင်ပြီး ဂိုးဖန်တီးမှုပြုလုပ်နိုင်ခဲ့တာလည်း ဖြစ်ပါတယ်။