အာနိုးလ်ကို ဒူးဒဏ်ရာကြောင့် ရက်သတ္တပတ်အနည်းငယ်လက်လွှတ်ရတော့မယ့် လီဗာပူးလ်

လီဗာပူးလ်အသင်းရဲ့အဓိကနောက်ခံလူ အာနိုးလ်ဟာ ဒူးဒဏ်ရာကြောင့် ရက်သတ္တပတ်အနည်းငယ်အနားယူရမယ်လို့ လက်ထောက်နည်းပြ လီဂျင်ဒါက ပြောလိုက်ပါတယ်။

အာနိုးလ်ဟာ လီဗာပူးလ်အသင်းက အာဆင်နယ်အသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ FA ဖလားတတိယအဆင့်ပွဲစဉ်မှာ ဒူးဒဏ်ရာရရှိခဲ့တာပါ။အာနိုးလ်ရဲ့ဒဏ်ရာအခြေအနေကို စကန်ဖတ်စစ်ဆေးမှုတွေပြုလုပ်ခဲ့ရာမှာ ကစားသမားဟာ ရက်သတ္တပတ်အနည်းငယ်အနားယူရတော့မှာဖြစ်ပါတယ်။

အာနိုးလ်ဟာ ဒဏ်ရာကြောင့် မနက်ဖြန်ကစားမယ့် ဖူလ်ဟမ်အသင်းနဲ့ ကာရာဘောင်းဖလားဆီမီးဖိုင်နယ်ပထမအကျော့ပွဲစဉ်ကို လွဲချော်သွားပြီဖြစ်ပါတယ်။လီဗာပူးလ်အသင်းကတော့ အာနိုးလ်ကို ၃ ပတ်ကြာလောက်လက်လွှတ်ရမယ်လို့ မျှော်လင့်ထားတာပါ။အာနိုးလ်ရဲ့ဒဏ်ရာဟာ ဒီရာသီမှာ ရလဒ်ကောင်းတွေရရှိနေတဲ့ လီဗာပူးလ်အသင်းအတွက် ကြီးမားတဲ့ ထိုးနှက်ချက်ဖြစ်ခဲ့ပါတယ်။

လီဗာပူးလ်အသင်းဟာ လက်ရှိအချိန်မှာ အာနိုးလ်အပြင် နောက်ခံလူတွေဖြစ်တဲ့ ရောဘတ်ဆန်၊ မာတစ်နဲ့ ဆီမီကတ်စ်တို့ကို အနားပေးထားရပြီး ရောဘတ်ဆန်နဲ့ ဆီမီကတ်စ်တို့ဟာ အခုလအကုန်မှာ အသင်းနဲ့ လေ့ကျင့်မှုတွေပြန်လည်ပြုလုပ်မယ်လို့သိရပါတယ်။အာနိုးလ်ဟာ ဒီရာသီမှာ လီဗာပူးလ်အသင်းအတွက် ၂၅ ပွဲကစားထားရာမှာ ၂ ဂိုးသွင်းပြီး ၉ ဂိုးဖန်တီးထားပါတယ်။