တူရကီကလပ် ဖီနာဘာချီအသင်းဟာ အသင်းလူစာရင်းအင်အားကို တောင့်တင်းစေဖို့အတွက် ယူနိုက်တက်အသင်းတိုက်စစ်မှူး မာရှယ်ကို ခေါ်ယူဖို့ စတင်လုပ်ဆောင်နေပြီဖြစ်ပါတယ်။
ယူနိုက်တက်အသင်းက မာရှယ်ကို စာချုပ်သက်တမ်းတိုးဖို့ လုပ်ဆောင်နေတယ်လို့ နည်းပြ အဲရစ်တန်ဟတ်က ပြောပြီးရက်ပိုင်းအကြာမှာပဲ တူရကီကလပ် ဖီနာဘာချီအသင်းက အပြောင်းအရွှေ့အတွက် စတင်လုပ်ဆောင်လာခဲ့တာပါ။တူရကီမီဒီယာတစ်ခုက ဖီနာဘာချီအသင်းဟာ မာရှယ်အတွက် ယူနိုက်တက်အသင်းကို ပေါင် ၆.၈ သန်းနဲ့ ပထမဆုံးအကြိမ် ကမ်းလှမ်းခဲ့တယ်လို့ ဖော်ပြခဲ့ပါတယ်။
တူရကီကလပ်က ယူနိုက်တက်နဲ့ ကောင်းမွန်တဲ့ ဆက်ဆံရေးရှိတဲ့အတွက် မာရှယ်ကို ခေါ်ယူနိုင်မယ်လို့ ယုံကြည်မှုရှိနေတာပါ။ဖီနာဘာချီနဲ့ယူနိုက်တက်အသင်းတို့ဟာ ပြီးခဲ့တဲ့ ဇန်နဝါရီအပြောင်းအရွှေ့မှာ ကစားသမားအရောင်းအဝယ်တွေရှိခဲ့ကြတာဖြစ်ပါတယ်။ဖရက်ဒ်က ယူနိုက်တက်အသင်းကနေ ဖီနာဘာချီအသင်းထံ ပြောင်းခဲ့ပြီး ဂိုးသမားဘယင်ဒါက ဖီနာဘာချီအသင်းကနေ ယူနိုက်တက်အသင်းထံ ပြောင်းရွှေ့ခဲ့တာပါ။
၂၀၁၅ က မိုနာကိုအသင်းကနေ ရောက်ရှိလာခဲ့တဲ့ မာရှယ်ဟာ ယူနိုက်တက်အသင်းအတွက် ၃၁၇ ပွဲပါဝင်ကစားထားပြီး ဂိုး ၉၀ သွင်းယူထားကာ ၅၅ ဂိုးဖန်တီးမှုပြုလုပ်ထားပါတယ်။မာရှယ်ကို ခေါ်ယူဖို့ ဝက်စ်ဟမ်းနဲ့ အင်တာမီလန်အသင်းတို့ကလည်း အရင်က ချိတ်ဆက်မှုတွေပြုလုပ်ခဲ့တာဖြစ်ပါတယ်။