ဘန်လေအသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ မန်စီးတီးအသင်းအတွက် ခြေစွမ်းပြပြီး ၂ ဂိုးသွင်းယူနိုင်ခဲ့တဲ့ တိုက်စစ်မှူး အယ်လ်ဗားရက်ဇ်ကို နည်းပြ ဂွာဒီယိုလာက ချီးကျူးသွားခဲ့ပါတယ်။
အသက် ၂၄ နှစ်အရွယ်ရှိ အယ်လ်ဗားရက်ဇ်ဟာ ဒီပွဲမှာသွင်းယူတဲ့ ၂ ဂိုးကြောင့် ဒီရာသီပြိုင်ပွဲစုံသွင်းဂိုး ၁၅ ဂိုးအထိရှိသွားခဲ့ပြီး မနှစ်ကရာသီကသွင်းဂိုးကို မှီဖို့ ၂ ဂိုးသာကွာတော့တာဖြစ်ပါတယ်။အယ်လ်ဗားရက်ဇ်ဟာ တိုက်စစ်မှူး ဟာလန်းမပါဝင်နိုင်တဲ့အချိန်မှာ မန်စီးတီးအသင်းရဲ့တိုက်စစ်ကို အကောင်းဆုံးဦးဆောင်ပြီး ခြေစွမ်းပြသနေတာပါ။
အယ်လ်ဗားရက်ဇ်ဟာ လက်ရှိအချိန်မှာ မန်စီးတီးအသင်းနဲ့ ပရီးမီးယားလိဂ်၊ချန်ပီယံလိဂ်ဖလားတို့ကို ရယူနိုင်ခဲ့ပြီး အာဂျင်တီးနားအသင်းနဲ့ ကမ္ဘာ့ဖလားချန်ပီယံဆုတို့ကို ရယူထားတာဖြစ်ပါတယ်။အဲ့ဒါကြောင့် မန်စီးတီးအသင်းနည်းပြ ဂွာဒီယိုလာက အယ်လ်ဗားရက်ဇ်ဟာ ကမ္ဘာ့အကောင်းဆုံးကစားသမားတွေထဲက တစ်ဦးဖြစ်နေပြီလို့ ဆိုခဲ့ပါတယ်။
ဂွာဒီယိုလာက”သူ့ရဲ့အသက်အရွယ်၊ပရီးမီးယားလိဂ်ကိန်းဂဏန်းတွေနဲ့ အသင်းအတွက်လုပ်ပေးခဲ့တဲ့အရာတွေကို ကြည့်ရင် မယုံနိုင်စရာပါပဲ။သူဟာ မက်ဆီ၊ဒီမာရီယာ၊အန်ဇိုတို့နဲ့ တွဲကစားနေတဲ့ ကမ္ဘာ့ချန်ပီယံပါ။မင်းသာ မကောင်းဘူးဆိုရင် ဒီလိုအသင်းမှာ ကစားနိုင်မှာမဟုတ်ပါဘူး။သူဟာ မတူညီတဲ့ နေရာ ၃ နေရာမှာကစားနိုင်ပြီး တကယ်ကိုကောင်းတဲ့သူပါ”လို့ဆိုခဲ့ပါတယ်။
အယ်လ်ဗားရက်ဇ်ဟာ မန်စီးတီးအသင်းအတွက် ၈၁ ပွဲပါဝင်ကစားထားပြီး ၃၂ ဂိုးသွင်းယူထားတာဖြစ်ပါတယ်။