အာဂျင်တီးနားအသင်းဟာ ဖီဖာခြေစမ်းပွဲကစားဖို့ ဇွန်လအတွင်းမှာ ဘင်္ဂလားဒေ့ရှ်လာရောက်ဖို့ ရှိတယ်လို့ ဘင်္ဂလားဒေ့ရှ်ဘောလုံးအဖွဲ့ချုပ်ဥက္ကဋ္ဌ ကာဇီဆာလာဟူဒင်က ပြောလိုက်တာဖြစ်ပါတယ်။
ဘင်္ဂလားဒေ့ရှ် ပရိသတ်တွေဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲတစ်လျှောက် ချန်ပီယံဖြစ်ခဲ့တဲ့ အာဂျင်တီးနားအသင်းကို အမာခံအားပေးခဲ့ကြတာပါ။သူတို့ရဲ့ အားပေးပုံတွေဟာ ကမ္ဘာမီဒီယာတွေပေါ်မှာ ပျံနှံခဲ့တာပါ။
အဲ့ဒီနောက်ပိုင်းမှာ ဘင်္ဂလားဒေ့ရှ်ဘောလုံးအဖွဲ့ချုပ်ဟာ အာဂျင်တီးနားလက်ရွေးစင်အသင်းကို နိုင်ငံအတွင်း ခေါ်ဆောင်ဖို့ ဆွေးနွေးမှုတွေကို အရှိန်အဟုန်နဲ့ လုပ်ဆောင်လာခဲ့တာကြောင့် ခြေစမ်းပွဲဖြစ်မြောက်ဖို့ နီးစပ်ခဲ့တာဖြစ်ပါတယ်။
ကာဇီဆာလာဟူဒင်က “ဘင်္ဂလားဒေ့ရှ်ကို လာရောက်မယ့် အာဂျင်တီးနားအသင်းရဲ့ ခရီးစဉ်ဟာ အပြီးသတ်လုနီးပါးဖြစ်နေပါပြီ။ဖီဖာရဲ့ နိုင်ငံတကာပွဲစဉ်တွေကစားဖို့ သတ်မှတ်ထားတဲ့ ဇွန်လထဲမှာ လာမယ်လို့ သူတို့က ကျနော်တို့ကို အကြောင်းကြားထားပါတယ်အရာအားလုံး အဆင်ပြေရင်တော့ သူတို့လာမယ်ဆိုတာ ပြောလို့ရတယ်”လို့ ပြောခဲ့တာဖြစ်ပါတယ်။
အာဂျင်တီးနားအသင်း ဘင်္ဂလားဒေ့ရှ်ကို နောက်ဆုံးလာရောက်ခဲ့တာက ၂၀၁၁ စက်တင်ဘာလ ၆ ရက်ကဖြစ်ပြီး နိုင်ဂျီရီးယားအသင်းနဲ့ ခြေစမ်းပွဲကစားခဲ့တာဖြစ်ပါတယ်။
