ပြင်သစ်လက်ရွေးစင်ဂိုးသမား ဟူဂိုလိုရစ်ဟာ အသက် ၃၆ နှစ်အရွယ်မှာပဲ လက်ရွေးစင်ကစားသမားဘဝကနေ အနားယူပြီဖြစ်တယ်လို့ ကြေညာလိုက်ပြီဖြစ်ပါတယ်။
ပြင်သစ်အသင်းဟာ ပြီးခဲ့တဲ့ ကမ္ဘာ့ဖလားပြိုင်ပွဲမှာ အာဂျင်တီးနားအသင်းကို အရေးနိမ့်ခဲ့ပြီးနောက် ၃ ပတ်အကြာမှာ ဟူဂိုလိုရစ်က ဒီဆုံးဖြတ်ချက်ကို ကြေညာခဲ့တာပါ။
ဟူဂိုလိုရစ်ဟာ ပြီးခဲ့တဲ့ ၂၀၁၈ ကမ္ဘာ့ဖလားပြိုင်ပွဲမှာ ပြင်သစ်အသင်း ချန်ပီယံဆုရယူခဲ့ရာမှာ အသင်းခေါင်းဆောင်အဖြစ် ဦးဆောင်ခဲ့တာဖြစ်ပါတယ်။
လိုရစ်က “ကျွန်တော်ဟာ အရာအားလုံးကို ပေးခဲ့ပြီးပြီလို့ ခံစားရတာကြောင့် နိုင်ငံတကာကစားသမားဘဝကို ရပ်တန့်ဖို့ ဆုံးဖြတ်လိုက်ပါပြီ။ယူရိုခြေစစ်ပွဲမစတင်ခင်မှာ ဒါကို ကြေညာဖို့ အရေးကြီးတယ်”လို့ ထင်ကြောင်းပြောခဲ့ပါတယ်။
လိုရစ်ဟာ ၂၀၀၈ နိုဝင်ဘာလက ဥရုဂွေးနဲ့ ခြေစမ်းပွဲမှာ ပြင်သစ်အတွက် စတင်ပွဲထွက်ခွင့်ရခဲ့တာဖြစ်ပြီး ပွဲပေါင်း ၁၄၅ ပွဲပါဝင်ကစားခဲ့ပါတယ်။သူဟာ အသင်းခေါင်းဆောင်အဖြစ် ပြင်သစ်အသင်းကို ၁၂၁ ပွဲအထိ စံချိန်တင် ဦးဆောင်ခဲ့တာလည်းဖြစ်ပါတယ်။
