မော်ရင်ဟိုဟာ ဘရာဇီးလ်အသင်းနည်းပြဖြစ်လာမှာဖြစ်လို့ လက်ထောက်နည်းပြကိုတောင် ရှာဖွေနေပြီလို့ ပေါ်တိုကစားသမားဟောင်း ကားလို့စ်အယ်လ်ဘာတိုက ပြောလိုက်ပါတယ်။
ဘရာဇီးလ်အသင်းဟာ ပြီးခဲ့တဲ့ ကမ္ဘာ့ဖလားအပြီးမှာ နည်းပြဖြစ်သူ တီထီနဲ့ လမ်းခွဲခဲ့ပြီးနောက် နည်းပြသစ်ရှာဖွေနေတာဖြစ်ပြီး ရိုးမားအသင်းနည်းပြ မော်ရင်ဟိုဟာ နည်းပြဖြစ်လာနိုင်တဲ့ စာရင်းထဲမှာ ပါဝင်နေတာပါ။
ကားလို့စ်အယ်လ်ဘာတိုက “မော်ရင်ဟိုက ဘရာဇီးလ်အသင်းနည်းပြသစ် ဖြစ်လာနိုင်ပါတယ်။ဒါကို ကျွန်တော် လုူသိရှင်ကြားချပြတာပါ။သူက ကျွန်တော့်ကို လက်ထောက်နည်းပြလုပ်ဖို့တောင် ခေါ်ထားတာပါ”လို့ ဆိုခဲ့ပါတယ်။
မော်ရင်ဟိုဟာ ပေါ်တူဂီနည်းပြရာထူးအတွက်လည်း ရေပန်းစားခဲ့ပေမယ့် ပေါ်တူဂီအသင်းဟာ ဘယ်လ်ဂျီယံနည်းပြဟောင်း မာတီးနတ်စ်ကို ခန့်အပ်ဖို့ ရှိနေတာကြောင့် ဘရာဇီးလ်နည်းပြသစ်အဖြစ် ပိုပြီး ရေပန်းစားလာခဲ့တာဖြစ်ပါတယ်။
ရိုးမားနဲ့ မော်ရင်ဟိုတို့ ချုပ်ဆိုထားတဲ့ စာချုပ်ဟာ ၂၀၂၄ မှာ ကုန်ဆုံးမှာဖြစ်ပြီး အီတလီကလပ်ကတော့ မော်ရင်ဟိုကို ထွက်ခွာခွင့်မပေးချင်တာဖြစ်ပါတယ်။ဒါကြောင့် မော်ရင်ဟိုဟာ ဘရာဇီးလ်နည်းပြသစ်ဖြစ်မလားဆိုတာ စောင့်ကြည့်ရမှာဖြစ်ပါတယ်။
