ပီအက်စ်ဂျီနဲ့ အာဂျင်တီးနားတိုက်စစ်မှူး မက်ဆီဟာ ၂၀၂၃ အတွက် ချီးမြှင့်တဲ့ Laureus ဆုပေးပွဲမှာ တစ်နှစ်တာအကောင်းဆုံးအားကစားသမားဆုကို ရရှိသွားခဲ့ပါတယ်။
အားကစားလောကရဲ့ဂုဏ်သိက္ခာရှိတဲ့ ဒီဆုကို မက်ဆီဟာ ဒုတိယအကြိမ်မြောက်ရယူနိုင်ခဲ့တာဖြစ်ပြီး ၂၀၂၀ က ပထမတစ်ကြိမ်ရယူနိုင်ခဲ့တာပါ။မက်ဆီဟာ ဒီဆုကို ရရှိတဲ့ တစ်ဦးတည်းသော ဘောလုံးသမားလည်း ဖြစ်ခဲ့ပါတယ်။
အခုနှစ်အတွက်ပေးအပ်တဲ့ ဒီဆုပေးပွဲမှာ မက်ဆီအပြင် ၂၀၂၂ ကမ္ဘာ့ဖလားရရှိခဲ့တဲ့ အာဂျင်တီးနားအသင်းကလည်း တစ်နှစ်တာအကောင်းဆုံးအသင်းဆုကို ရရှိခဲ့ပါတယ်။အဲ့ဒါကြောင့် မက်ဆီဟာ တစ်ဦးချင်းဆုနဲ့ အသင်းလိုက်ဆုရရှိတဲ့ ပထမဆုံးအားကစားသမားအဖြစ်လည်း မှတ်တမ်းတင်နိုင်ခဲ့တာပါ။
မက်ဆီဟာ ပြီးခဲ့တဲ့ ကမ္ဘာ့ဖလားပြိုင်ပွဲမှာ အာဂျင်တီးနားအသင်းကို အကောင်းဆုံးဦးဆောင်နိုင်ခဲ့လို့ ဘောလွန်းဒီအောဆုရယူနိုင်ဖို့လည်း ရေပန်းစားနေပြီး တစ်ဦးချင်းဆု အများအပြားကို ထပ်ပြီး သိမ်းပိုက်သွားဖို့ ရှိနေတာဖြစ်ပါတယ်။
မက်ဆီဟာ မကြာသေးခင်က ဆော်ဒီခရီးစဉ်ကြောင့် ပီအက်စ်ဂျီနဲ့ အဆင်မပြေမှုတွေရှိခဲ့ပေမယ့် အခုအကြိမ်မှာတော့ တောင်းပန်မှုပြုလုပ်ပြီးနောက် လေ့ကျင့်မှုတွေပြန်လည်ပြုလုပ်နေပြီဖြစ်ပါတယ်။
