ကမ္ဘာ့ချန်ပီယံ အာဂျင်တီးနားအသင်းဟာ ဖီဖာက ထုတ်ပြန်ခဲ့တဲ့ ကမ္ဘာ့အဆင့်သတ်မှတ်ချက်မှာ အဆင့် ၁ နေရာကို ရောက်ရှိလာခဲ့ပြီး ဒါဟာ ၆ နှစ်အကြာမှ သူတို့အတွက် ပထမဆုံးအကြိမ် ဒီနေရာကို ရောက်ရှိလာခဲ့တာဖြစ်ပါတယ်။
အာဂျင်တီးနားအသင်းဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ ပြင်သစ်အသင်းကို အနိုင်ရပြီး ချန်ပီယံဆုကို ရယူနိုင်ခဲ့တာဖြစ်ပြီး နောက်ဆုံးကစားခဲ့တဲ့ ခြေစမ်းပွဲတွေမှာလည်း ပနားမားနဲ့ ကူရာကာအိုတို့ကို အနိုင်ရယူနိုင်ခဲ့တာပါ။
အဲ့ဒါကြောင့် ဘရာဇီးလ်ကို ကျော်တက်ပြီး အာဂျင်တီးနားအသင်းဟာ ကမ္ဘာ့အဆင့် ၁ နေရာကို ရယူနိုင်ခဲ့သလို ပြင်သစ်အသင်းဟာ တစ်ဆင့်တက်လာပြီး အဆင့် ၂ နဲ့ ဘရာဇီးလ်ကတော့ အဆင့် ၃ နေရာကို ရောက်ရှိသွားခဲ့ပါတယ်။
ဘယ်လ်ဂျီယံအသင်းဟာ ကမ္ဘာ့ဖလားပြိုင်ပွဲမှာ အုပ်စုကနေ ထွက်ခွာခဲ့ရပေမယ့် ကမ္ဘာ့အဆင့် ၄ နေရာမှာ ရပ်တည်နေပြီး အင်္ဂလန်က အဆင့် ၅ ၊ နယ်သာလန်က အဆင့် ၆ နဲ့ ခရိုအေးရှားက အဆင့် ၇ နေရာမှာရပ်တည်နေပါတယ်။
အီတလီ၊ပေါ်တူဂီနဲ့ စပိန်တို့ကတော့ ၈ ၊ ၉နဲ့ ၁၀ နေရာတွေမှာ အစဉ်လိုက်ရပ်တည်နေတာဖြစ်ပါတယ်။